Búgin Úkimet otyrysynan keiin QR Bilim jáne ǵylym ministri Ashat Aimaǵambetov mektepte oqýshylardyń synyp edenin jýýy bastamasyna qatysty pikir bildirdi, dep habarlaidy "Ult aqparat".
«Eń aldymen mundai másele Bilim jáne ǵylym ministrliginiń kún tártibinde turǵan joq. Ekinshiden, búgingi kúni el aýqymynda júzege asyrylmaidy. Úshinshiden, mektep biýdjetinde tiisti qarajat pen ákimshilik-tehnikalyq qyzmetker shtaty qarastyrylǵan. Tórtinshiden, mundai jumystarǵa oqýshylardyń bastamasymen jáne ata-analardyń kelisimimen ǵana ruqsat etiledi», - dedi ministr BAQ ókilderine.
Onyń atap ótýinshe, Qazaqstanda májbúrli jumysqa tiisti organdar ǵana tarta alady.
«Árine, eńbekke baýlý - mekteptegi oqý-tárbie jumysynyń óte mańyzdy bóligi ekendigi sózsiz. Mektep te, otbasy da eńbekke baýlýy tiis. Sondyqtan mundai jumys júrgiziledi jáne mektepterde túrli sharalar arqyly júzege asyrylady. Osy sharalar arqyly ǵana birden eńbekke degen súiispenshilik oiatýǵa bolady dep oilaý jón emes. Degenmen, bul da mańyzdy másele», - dedi ol.
Ashat Aimaǵambetovtiń atap ótýinshe, ata-analar úilerinde balalaryna ydys-aiaq, eden jýǵyzý, úi jinaý syndy jumystarǵa aralastyryp otyrýy qajet.
«Bul balalardy kishkentai kezinen tárbieleýdiń qarapaiym ǵana dúniesi. Tolyqtai alǵanda, óte durys másele kóterilip otyr dep esepteimiz. Degenmen ony naýqanshyldyqqa ainaldyryp jibermeý kerek. Bul rette ata-analar men balalardyń bastamasy bolýy tiis», - dedi ol.
