Tehnologiialardyń qarqyndy damýy, eńbek naryǵy talaptarynyń ózgerýi jáne jasandy intellektiniń ómirdiń barlyq salasyna keńinen enýine bailanysty bilim berý mazmunyn jańartý boiynsha júieli jumys júrgizilýde. Bul jumys 2025 jyldyń qyrkúieginen bastap kezeń-kezeńimen iske asyrylyp keledi, dep habarlaidy ult.kz QR Oqý-aǵartý ministrligine silteme jasap.
Keiin bul baǵyttaǵy jumystyń quqyqtyq negizi nyǵaityldy. 2025 jylǵy qarashada «Jasandy intellekt týraly» Qazaqstan Respýblikasynyń Zańy, al 2026 jylǵy mamyrda orta bilim berý júiesine jasandy intellektini engizý jónindegi Prezident Jarlyǵy qabyldandy. Osy qujattardy iske asyrý aiasynda memlekettik jalpyǵa mindetti bilim berý standarty, úlgilik oqý josparlary men úlgilik oqý baǵdarlamalary jańartyldy.
1-4-synyptardaǵy «Tsifrlyq saýattylyq» pániniń ataýy «Tsifrlyq saýattylyq jáne jasandy intellekt», al 5-11-synyptardaǵy «Informatika» pániniń ataýy «Informatika jáne jasandy intellekt» bolyp ózgertildi. Bul tek pán ataýlarynyń ózgerýi emes. Jasandy intellekt tsifrlyq tehnologiialar men informatikanyń ajyramas bóligine ainaldy. Osyǵan bailanysty pánderdiń mazmunyna jasandy intellekt boiynsha jańa bólimder men barlyǵy 43 oqý maqsaty engizildi.
Búginde oqýshylar jasandy intellekt quraldaryn kúndelikti ómirde qoldanyp júr. Endigi mindet - olardy bul tehnologiiany jai ǵana paidalanýǵa emes, sanaly, tiimdi jáne jaýapty qoldanýǵa úiretý.
1-4-synyp oqýshylary «Mediasaýattylyq jáne JI» bólimi aiasyndaǵy 17 oqý maqsaty boiynsha jasandy intellektimen kúndelikti ómirden alynǵan qarapaiym mysaldar arqyly tanysady. Olar tsifrlyq qaýipsizdik, jeke derekterdi qorǵaý jáne tsifrlyq ortadaǵy jaýapty minez-qulyq negizderin meńgeredi.
5-9-synyp oqýshylary «Kompiýterlik oilaý jáne baǵdarlamalaý», «Densaýlyq, qaýipsizdik jáne JI» bólimderi aiasyndaǵy 14 oqý maqsaty boiynsha jasandy intellekt quraldaryn oqý protsesinde tiimdi qoldanýdy, saýatty suranystar qurastyrýdy, alynǵan nátijelerdi syni turǵydan baǵalaýdy, sondai-aq kiberqaýipsizdik pen akademiialyq adaldyq qaǵidattaryn saqtaýdy úirenedi.
10-11-synyptarda «Derekterdi basqarý jáne jasandy intellekt» bólimi aiasyndaǵy 12 oqý maqsaty boiynsha jasandy intellektiniń jumys isteý qaǵidattaryn túsinýge jáne ony praktikada qoldanýǵa basymdyq beriledi. Oqý mazmunyna mashinalyq oqytý, neirondyq jeliler, derekterdi taldaý jáne qoldanbaly kriptografiia negizderi engizilgen.
Jańartylǵan oqý baǵdarlamalary ótken oqý jylynda aprobatsiiadan sátti ótip, oń saraptamalyq qorytyndy aldy. Qazirgi ýaqytta olar belgilengen tártippen bekitilý satysynda.
Sonymen qatar pedagogter úshin bilim berý protsesinde jasandy intellektini tiimdi jáne qaýipsiz qoldaný jónindegi ádistemelik usynymdar ázirlenýde.
