Almaty qalasy fizika-matematika baǵytyndaǵy Nazarbaev ziiatkerlik mektebiniń 11 «M» synyp Liýbov Dýdchenko «Baiterek hackathon - 2019» innovatsiialyq jobalar baiqaýynda «Úzdik IT-joba» nominatsiiasy boiynsha birinshi oryndy jeńip aldy, dep habarlaidy "Ult aqparat".
Óz jobasyn júzege asyrý úshin Liýbovqa uiymdastyrýshylar tarapynan 1 000 000 teńgelik sertifikat berildi.
Hakatonǵa qatysýǵa 550-den astam ótinim kelip tússe, onyń 200-den astamy ǵana irikteýden ótken. Respýblikalyq baiqaýdyń finaly 29 qarasha men 1 jeltoqsan aralyǵynda «Qazaqstannyń turǵyn úi qurylys jinaq bankiniń» uiymdastyrýymen, «Báiterek» Ulttyq basqarýshy holdingi men «QazTech Ventures» kompaniiasynyń qoldaýymen Almaty qalasynda ótti.
«Baiqaýdyń basty maqsaty – joba ázirleýshiler men biznes-investorlar arasyndaǵy alshaqtyqty joiý» deidi uiymdastyrýshylar. Olar hakaton qatysýshylaryna bank klientteriniń úiden shyqpai-aq, qyzmetti onlain alýynyń baǵdarlamalyq jasaqtamasyn oilap tabýdy usyndy. Qatysýshylardyń usynǵan sheshimderi tiimdi, qarapaiym jolmen júzege asatyn jáne klientter úshin túsinikti bolýy tiis degen talap qoiylǵan.
Liýbov Dýdchenko joba boiynsha seriktesteri Ilias Ahmetov jáne Esentai Qurmanbaevpen birge bank úshin salymshy bonýstaryn jinap, óziniń virtýaldy úiin qurastyra alatyn mobildi qosymsha ázirlep shyǵarǵan.
«Bul bank klientteri salymynyń qarqynyn arttyrýǵa kómektesedi. Sonymen qatar, bul qosymshada jeke kýálikti skanerleýdiń arnaiy fýnktsiiasy bar. Onyń kómegimen banktegi kezekti qysqartýǵa bolady, sebebi saýalnama toltyrý jáne klientterdiń málimetterin derekter bazasyna jiberý avtomatty túrde júrgiziledi», - deidi Liýbov.
