Búgin Úkimet otyrysynda QR Bilim jáne ǵylym ministri Erlan Saǵadiev ministrlikke ustazdar men ata-analardan kelip jatqan usynystardy atady, dep habarlaidy "Ult aqparat".
"Bizge pedagogtar men ata-analardyń tarapynan jyl boiy usynystar túsip jatady. Onyń ishinde ulttyq biryńǵai testileý men keshendi testileý birdei fýnktsiiany atqarǵan soń, osy eki testileýdi birge ótkizýge qatysty usynys bar. Ekinshi, UBT joǵary oqý ornyna túsetin emtixan bolǵandyqtan, ony ótkizý sharalarynan mektep muǵalimderin bosatý. Úshinshi, mektep balalaryn UBT-ǵa emes, mektep baǵdarlamalaryn igerýge daiyndaý qajet bolǵandyqtan, mektepterde synama, "probnyi" testterin ótkizbeý. Tórtinshi, memlekettik bilim granttaryn oqý tiline - qazaq nemese orys tilderine bólmei taǵaiyndaý jáne taǵy birneshe usynys bar",- dedi E.Saǵadiev Úkimettiń búgingi otyrysynda.
Ministrdiń sózine qaraǵanda, barlyq usynystar Tamyz konferentsiiasynda keńinen talqylanady. Sonyń negizinde tiisti sheshimder qabyldanady.
Aita keteiik, otyrys barysynda ministr jańartylǵan mazmundaǵy bilim berý máselesine de toqtaldy. Onyń aitýynsha, jospar boiynsha biyl birqatar synyptar bilimniń jańartylǵan mazmunyna kóshetin bolady. "Ótken jyldan bastap 1-shi, 2-shi, 5-shi jáne 7-shi synyptar jańa oqý baǵdarlamasy boiynsha bilim alýda. Osy 2018-shi oqý jylynan bastap qosymsha 3-shi, 6-shy jáne 8-shi synyptar jańartylǵan mazmun boiynsha bilim ala bastaidy. Olarǵa arnalǵan oqýlyqtar daiyn. Barlyǵy saraptamadan ótti, basyldy. Oqýlyqtardy oblystarǵa jetkizý jumysy bastalyp ketti", - dedi E.Saǵadiev.
