Foto: shutterstock.com
Úkimet mektep kitaphanashylarynyń mártebesin kóterý úshin olardy "pedagog" laýazymyna teńestirý máselesin qarastyrady. Bul týraly vitse-premer – eńbek jáne halyqty áleýmettik qorǵaý ministri Tamara Dúisenovanyń depýtattyq saýalǵa bergen jaýabynda aitylǵan.
Qazirgi tańda Úkimettiń "Memlekettik bilim berý uiymdary qyzmetkerleriniń úlgi shtattaryn bekitý týraly" qaýlysynda "Pedagog-kitaphanashy" laýazymy qarastyrylmaǵan.
"Osyǵan bailanysty bilim berý uiymdaryndaǵy kitaphanashylardy "Pedagog" laýazymyna teńestirý máselesi jan-jaqty zerdelenip, pysyqtalady", - delingen jaýapta.
Júrgizilgen zertteýler nátijesinde kitaphanashylar «pedagog» laýazymyna teńestirilgen jaǵdaida «Pedagog mártebesi týraly» Qazaqstan Respýblikasy Zańynda qarastyrylǵan barlyq norma, onyń ishinde attestattaýdan ótý de olarǵa qatysty bolady.
Jalpy, orta merzimdi boljam nátijesine sáikes 2030 jylǵa qarai kitaphana qyzmetkerleri boiynsha qajettilik 6 987 adamdy quraidy, sonyń ishinde kitaphanashylar – 5 226 adam, kitaphana qyzmetshileri – 1 696 adam, kitaphana jumyskerleri – 65 adam.
Dúisenovanyń jaýabynda Ǵylym jáne joǵary bilim ministrligi bul qajettilikter boiynsha 2023-2024 oqý jylyna «V043-Kitaphana isi, aqparattardy óńdeý jáne muraǵat isi» bilim berý baǵdarlamalarynyń toptaryna 100 bilim berý grantyn bólýdi josparlap otyrǵany aitylǵan. Atalǵan kórsetkish 2022-2023 oqý jylymen salystyrǵanda 75%-ǵa joǵary.
"Osy rette sizderdiń depýtattyq saýaldaryńyzdaǵy «Kitaphana isi» mamandyǵyna memlekettik grantty 30% kóbeitý týraly usynys eskerilgenin habarlaimyn" - deidi ministr.
Aita keteiik, buǵan deiin Májilis depýtattary "Kitaphana isi" mamandyǵyn jetildirý jáne "Pedagog-kitaphanashy" mamandyǵyna litsenziia qarastyryp, biliktilik sanatyn berý máselesin kótergen bolatyn.
