Aqmola oblysynyń dárigerleri Arshaly kentinde mekteptiń jylý qazandyǵynyń jarylýynan zardap shekkenderdiń jaǵdaiy týraly aitty, dep habarlaidy QazAqparat agenttigi.
Oblystyq Densaýlyq saqtaý basqarmasy baspasóz qyzmetiniń málimetinshe, 32 jáne 39 jastaǵy eki jumysshynyń jaǵdaiyn dárigerler turaqty dep baǵalap otyr. Olardy emdeý sharalary Arshaly aýdandyq aýrýhanasynyń hirýrgiialyq bólimshesinde. júrgizilip jatyr.
«1990 jyly týǵan er adam sol jaq iyǵy men oń jaq jambasyna soqqy alǵan. Betiniń 5 paiyz bóligin termiialyq kúiik shalǵan. Jaǵdaiy «qanaǵattanarlyqqa» jaqyn.
1983 jyly týǵan er adamnyń diagnozy: bettiń, bilektiń jáne qoldyń 2-3-inshi dárejeli termiialyq kúiigi, 15 paiyzǵa deiin. Oń kóziniń tusy men ieginiń jyrtylǵan ashyq jaraqaty. Jaǵdaiy ortasha aýyrlyq kúide, gemodinamikasy turaqty, ystyǵy kóterilip turǵan joq, diýrez jetkilikti. Ekeýi de hirýrgiia bólimshesinde em qabyldap jatyr», - dep túsindirdi basqarmanyń baspasóz qyzmetinen.
Aita ketsek, Aqmola oblysynyń Arshaly kentinde mekteptiń jylý qazandyǵy jarylyp, úsh adam zardap shekken edi. Olardyń biri - 55 jastaǵy er adamnyń kóz jumǵany búgin habarlandy. Jergilikti atqarýshy organdar jerleý rásimderine qajetti materialdyq kómek kórsetetini aityldy.
Qazirgi kezde apattyń saldaryn joiý jáne jylý berýdi qalpyna keltirý boiynsha shuǵyl jumystar atqarylyp jatyr.
