Mektep formasyn qalai tańdaý kerek – bas sanitarlyq dáriger keńes berdi

Qazaqstannyń bas sanitarlyq dárigeri Jandarbek Bekshin mektep formasyn tańdaý boiynsha keńes berdi, dep habarlaidy Sputnik Qazaqstan.

Onyń aitýynsha, ata-analar mektep formasy men aiaq kiimdi durys tańdasa, balalar sabaq kezinde eshteńege alańdamaidy. Sondyqtan yńǵaily ári sapaly kiim alǵan durys. Sonda allergiialyq reaktsiia da bolmaidy.

"Balalar mektepte alty sabaqtan artyq ýaqyt otyrady. Sol sebepti forma tabiǵi talshyqtardan turatyn matadan tigilýi shart. Olar - jún, maqta, zyǵyr jáne jibek. Al sapasyz forma bolsa, balalar emin-erkin júre almaidy. Sebebi ondai matadan aýa ótpeidi", - dedi Bekshin astanada ótken baspasóz máslihatynda.

Bas sanitardyń sózine qaraǵanda, sapaly formanyń syrtqy kiiminde tabiǵi talshyqtardyń mólsheri kem degende 35 protsent bolýy qajet. Al ishki jaǵy 100 protsent bolýy shart. Bul – mektep formasynyń standarty. Ol barlyq gigienalyq talaptarǵa sáikes keledi.

"Al aiaq kiim tabiǵi bylǵarydan jasalýy kerek. Árine, aýystyryp kietin aiaq kiimdi de alǵanymyz durys. Qyzdardyń aiaq kiiminde mindetti túrde ókshe bolýy qajet. Onyń ortasha biiktigi - 3,5 santimetr. 4 santimetrden aspaýy kerek. Balalar ókshesiz aiaq kiim kise, jalpaq taban qalyptasýy ábden múmkin. Sporttyq aiaq kiim, kedy men cheshkidi ekinshi aiaq kiim retinde paidalanýǵa bolmaidy", - dep atap ótti Bekshin.

Sondai-aq, ol mektep sómkesine qatysty negizgi talaptardy atady.

"Oqýshynyń sómkesi, riýkzak deimiz ǵoi, bos sómkeniń salmaǵy bir keliden aspaýy qajet. Arqaǵa tiip turǵan jeri qatty bolýy shart. Iyqbaýlary jalpaq, moiynǵa salmaq túsirmeýi tiis. Sosyn sómkege jaryqtan shaǵylysatyn arnaiy belgilerdi ornatqan jón. Sonda túngi ýaqytta kólik júrgizýshileri balalardy alystan kóre alady", - dedi Bekshin astanada ótken baspasóz máslihatynda.

Bas sanitar qolda ustaityn portfeldi almaýǵa keńes berip otyr. Sebebi bala bir jaqqa qarai qisaiyp júredi.

"Mektep sómkesiniń salmaǵy oqýshynyń boiy men jas ereksheligine sai bolýy shart. Máselen, 1-3 synyp oqýshylarynyń sómkesi 2 keliden aspaýy tiis. 4-5 synypta – 2,5 keli, 6-7 synypta – 3,5 keli, al joǵary synyp oqýshylyrynyń sómkesi 4,5 keliden artyq bolmaýy qajet. Aýyr riýkzaktyń saldarynan skolioz, osteohondroz siiaqty aýrýlardyń týyndaitynyn umytpaýymyz qajet", - dep atap kórsetti Bekshin.