Búgin Úkimet múshelerinen quralǵan jumys toby Túrkistan oblysynyń ustazdarymen kezdesip, Prezidenttiń halyqqa arnaǵan Joldaýyn túsindirdi. Premer-Ministrdiń orynbasary Berdibek Saparbaev pen Bilim jáne ǵylym vitse-ministri Sholpan Karinova qujatta qamtylǵan ustazdardyń mártebesi men bilim salasynyń sapasyn sóz etti, dep habarlaidy "Ult aqparat".
Berdibek Saparbaev pedagogtarǵa Joldaýda mektepter men jalpy bilim salasyna kóp kóńil bólingenin, ustazdardyń jalaqysyn kóterý siiaqty máseleler qarastyrylǵanyn atap ótti. Sondai-aq bul baǵyttar boiynsha Úkimet tarapynan da kóptegen júieli jumystar atqarylyp jatqanyn jetkizdi.
«Mektep direktorynyń jalaqysy muǵalimnen tómen bolǵany durys emes. Onyń kólemi «Muǵalimderdiń mártebesine» bailanysty zań qabyldanǵannan keiin kóteriledi. Direktorlar men orynbasarlarynyń jalaqysy bilim sapasy men oqýshylardyń sanyna qarai ósetin bolady. Eńbekaqysy kóteriletin mamandardyń qatarynda taǵy ádiskerler men logopedter bar. Balalarmen tikelei jumys isteitin synyp jetekshileriniń ailyq aqysyna da ústeme aqsha tólenedi», - dedi Berdibek Saparbaev.
Úkimet basshysynyń orynbasary sondai-aq, balalardyń tárbiesine qatysty aityp, ustazdarǵa bul máselege kóbirek kóńil bólýdi eskertti.
«Synyp jetekshisi mektepke kelgen boida balanyń qabaǵynan bárin bilip otyratyndai deńgeige jetý kerek. Balanyń áke-sheshesi týraly, otbasyndaǵy jaǵdaiy týraly habardar bolýy tiis. Bos ýaqyty bolmas úshin balaǵa paidaly ispen ainalysýǵa jaǵdai jasaý qajet. Jalpy, bul baǵytta ata-analardyń jaýapkershiligin arttyrý qajet. Olardy sabaqtarǵa qatystyryp, bárin kórsetken durys. Tárbie sabaqtaryna ziialy qaýym ókilderin shaqyrǵan jón. Memleket, Úkimet metepterge barlyq jaǵdaidy jasap jatyr, qalǵan aýyrtpalyqtar, ustazdar, sizderge bailanysty», - dedi vitse-premer.
Ustazdarmen kezdesý barysynda jekemenshik balabaqshalar men mektepter salý barysynda jer ýchaskesine qol jetkizý, ondaǵy tekserý sharalarynyń kóptigi máseleleri sóz boldy. Sondai-aq, kolledjderde qoǵamǵa qajeti az mamandyqtar daiarlaý, ondaǵy bilim sapasynyń tómendigi týraly aityldy.
