Biyldan bastap mektep direktorlary men olardyń orynbasarlary attestatsiiadan ótip, eńbekaqysyn kóbeite alady. Bul týraly QR Bilim jáne ǵylym ministri Ashat Aimaǵambetov aityp berdi, dep habarlaidy "Ult aqparat".
«Pedagogtardyń sapalyq quramyn arttyrý jumystary júrgizildi. Qazirgi ýaqytta 150 myńnan astam pedagog biliktilik sanatyn rastap, laýazymdyq eńbekaqysynyń 30-50 paiyzy kóleminde ústemeaqy alyp jatyr», - dedi ministr Feisbýk jelisinde halyq aldynda esep berý barysynda.
Onyń aitýynsha, pedagogtardy attestatsiialaý júiesi jetildirilip, bilim berý uiymdarynyń basshylaryn da attestatsiiadan ótkizý talaby engizilgen.
«Jalpy ol - belgili problemanyń biri. Qazirgi ýaqytta direktorlardyń jalaqysy óte az, jetkiliksiz. Ol úshin birneshe shara qabyldadyq. Birinshiden, biyl jáne kelesi 4 jyl ishinde jalaqynyń eki ese ósýi direktorlarǵa da qatysty bolady. Ekinshiden, direktorlar men olardyń orynbasarlaryn attestatsiiadan ótkizý institýty engizildi. Iaǵni, endi direktorlar men olardyń orynbasarlary óz jumysynyń tiimdiligin kórsetken jaǵdaida ai saiynǵy jalaqysyna 30-dan 100 paiyzǵa deiin qosymsha ústemeaqy alatyn bolady», - dep túsindirdi A. Aimaǵambetov.
Osy júie daiyn, tiisti normativtik-quqyqtyq aktilerdi daiyndadyq. Osy aidan bastap, mektep direktorlary men olardyń orynbasarlary osy júiemen test tapsyra bastaidy.
«Onyń nátijesinde kei direktorlardy ornynan alý nemese basqa mektepke jiberý múmkindigi bolady. Al jaqsy jumys istep jatqan basshylar ústemeaqy alyp, ári qarai óz jumystaryn jalǵastyrady», - dedi Bilim jáne ǵylym ministri.
