Bilim jáne ǵylym ministri Erlan Saǵadiev mektep bitirýshiler keshine qatysqysy kelmeitin oqýshylar men ata-analardy eshkim qinamaitynyn aitty. Olardyń resmi attestat tapsyrý saltanatyna ǵana qatysýyna bolady, dep habarlaidy Baq.kz tilshisi.
Ministr OKQ brifingi barysynda vedomstvoǵa jii qoiylatyn birqatar suraqqa jaýap berdi.
«Jii kóteriletin suraqtyń biri - mektep bitirýshiler keshin ótkizý úshin mektepter kóp aqsha jinaidy. Ministrlik tarapynan osyny baqylaýǵa jáne is sharany ótkizý formatyn usynýǵa bola ma? Osyǵan jaýap bersek, bizdiń ózimizdiń arnaiy osy keshti ótkizetin kontseptsiialarymyz joq. Ol - jyl saiyn ótkiziletin resmi mereke. Mektepter ózi qalai ótkizetinin jaqsy biledi. Ótkizemiz dese, mektep ákimshiligi, baqylaý keńesi men ata-analar keńesi barlyǵy jinalyp, sheshim qabyldaidy. Ata-analar «barmaimyn, aqsha jinamaimyn, bermeimin» dese, olardyń árqashan da resmi bóligine, iaǵni attestat tapsyrý saltanatyna qatysyp, ári qarai eshqaida barmai, úige qaityp ketýine bolady. Olardy eshkim qinamaidy», - dedi Erlan Saǵadiev Ortalyq kommýnikatsiialar qyzmetinde ótken brifingte.
