«Qazaq kúresi», «toǵyzqumalaq», «asyq atý» dene shynyqtyrý sabaqtaryna ulttyq sport túrleri retinde engiziledi. Bul týraly QR Mádeniet jáne sport vitse-ministri Erlan Qojaǵapanov aitty, dep habarlaidy "Ult aqparat".
2020 jyly 30 jeltoqsanda Memleket basshysy «Qazaqstan Respýblikasynyń keibir zańnamalyq aktilerine mádeniet, dene shynyqtyrý jáne sport máseleleri boiynsha ózgerister men tolyqtyrýlar engizý týraly» Qazaqstan Respýblikasynyń Zańyna qol qoidy. Zańnyń negizgi baǵyttary BJDDK jáne dárigerlik-dene shynyqtyrý dispanserler jelisin keńeitýge, halyqpen jumys isteitin shtattyq sport nusqaýshylaryn qamtamasyz etýge, sporttyq meditsina men adaptivti dene shynyqtyrý salasyndaǵy mamandardy daiarlaý jáne olardyń biliktiligin arttyrý úshin jaǵdailar jasaýǵa arnalǵan.
«Zań aiasynda «qazaq kúresi», «toǵyzqumalaq», «asyq atý» boiynsha bilim berýdiń barlyq deńgeilerinde dene shynyqtyrý sabaqtaryna ulttyq sport túrleriniń mindetti komponentin engizý josparlanýda», - dedi E. Qojaǵapanov Májilistiń Áleýmettik-mádeni damý komitetiniń keńeitilgen otyrsynda.
Sonymen qatar, biyldyń 27 sáýirinde memlekettik sporttyq jáne shyǵarmashylyq tapsyrys arqyly sport sektsiialary men shyǵarmashylyq úiirmelerdi jan basyna qarjylandyrý boiynsha normativtik quqyqtyq aktiler memlekettik tirkeýden ótti.
«Biylǵy 1 mamyrdan bastap barlyq óńirler qatysatyn memlekettik sporttyq jáne shyǵarmashylyq tapsyrys tetigi jan basyna qarjylandyrý platformasy arqyly iske asyrylady. Osy normalardy qabyldaý buqaralyq sportty, onyń ishinde balalar sportyn damytýǵa oń áserin tigizedi dep sanaimyn», - dedi vitse-ministr.
