Shákárim men Abaidyń filosofiialyq lirikasy qaitadan ashylýy kerek. Abai Qunanbaiulynyń 174 jyldyǵyna orai elordada ótken rahýni-taǵylymdyq is-sharada belgili abaitanýshy, professor Mekemtas Myrzahmetov osylai dedi, dep habarlaidy QazAqparat.
«Abaidy ár kezde ulyqtap jatamyz. Ulyqtaý – durys. Biraq, mánine jetip ulyqtaýymyz kerek. Abaidyń rýhani álemi men pálsapalyq lirikasyna Eýropa da, Shyǵys ta jete almaǵan. Shákárim men Abaidyń filosofiialyq lirikasy qaitadan ashylýy kerek. Bul – bir. Zaman ózgerdi. Dúnietanym ózgerdi. Biz endi uly sanaǵa qarai jol tarttyq. Endigi tanym uly sanaǵa qarai ketedi. Ony burynǵy babalarymyz áldeqashan bilgen, keiingi ómir opan-topan bolǵan kezde olardy shaiyp ketti de, qaitadan osy jolǵa oralýǵa májbúr bolyp otyrmyz. Abaidan qalǵan bir mura bar: Abaida «Tolyq adam» ilimi degen bar. «Tolyq adam» ilimin meńgergen adam ózin-ózi rýhani tazalaidy. Qazir osy ilim Qazaqstandaǵy 8 ýniversitette oqytylyp jatyr. Sonyń monografiiasyn jazyp bitirdim. Ol tolyq jariialandy. Endi búkil qazaq jastaryn Abaidyń álemimen tazartý máselesi aldymyzǵa qoiylyp otyr. Onyń oqýlyǵy daiar boldy», - dedi ol.
Eske sala ketsek, búgin Abai Qunanbaiulynyń dúniege kelgenine 174 jyl tolýyna orai elordada «Abai álemi» atty rýhani-taǵylymdyq is-shara ótken bolatyn. Onda elimizge belgili ziialy qaýym ókilderi, abaitanýshylar men qala ákimdiginiń ókilderi bas qosty.
