Meditsinalyq uiymdar halyqqa tegin qyzmet kórsetý úshin qajetti dári-dármekti satyp ala almai jatyr. Oǵan satyp alýdy júzege asyrýy tiis veb-portaldyń jumys istemeýi sebep bolyp otyr, dep habarlaidy QazAqparat «Atameken» UKP-ge silteme jasap.
Mamyr aiynda Úkimet tegin meditsinalyq kómektiń kepildik berilgen kólemi jáne MÁMS júiesi sheńberinde dári-dármekter men meditsinalyq buiymdardy satyp alýdy retteitin qaǵidalarǵa engiziletin ózgeristerdi qabyldady. Qujattyń jańa redaktsiiasynda dástúrli tásilmen satyp alý protsedýralaryn ótkizý múmkindigi tolyǵymen alynyp tastaldy. Endi aýrýhanalar belgili bir dári-dármek «SK-Farmatsiia» biryńǵai distribýtsiia júiesi arqyly satyp alynatyn preparattar tizimine enbese de, olardy elektrondy tásilmen ǵana satyp alýy tiis.
«Atameken» UKP atqarýshy hatshysy, basqarma múshesi Nurlan Saqýovtyń aitýynsha, satyp alýdy elektrondy formatqa aýystyrý – qisyndy ári boljamdy protsess. Alaida, satyp alýdyń elektrondy platformasyn tolyǵymen jolǵa qoimai jatyp, dástúrli satyp alýdy alyp tastaý arqyly Densaýlyq saqtaý ministrligi meditsinalyq uiymdardy da, meditsinalyq zattar men tehnikany jetkizýshilerdi de tyǵyryqqa tiredi.
«Meditsinalyq qyzmetterdi kórsetýge qajetti barlyq preparat pen meditsinalyq buiymdardyń barlyǵy «SK-Farmatsiia» arqyly satyla bermeidi. Aýrýhanalar dári-dármektiń kóptegen atalymyn izdep, satyp alady. Qazirgi kezde portaldyń daiyn bolmaýy saldarynan ónimniń osy túrlerin satyp alý tolyǵymen toqtap tur. Farmatsevtikalyq ónimderdiń óndirýshileri men jetkizýshileri portalǵa kire almai otyr. Osydan patsientter – qatardaǵy qazaqstandyqtar zardap shegip jatyr. Densaýlyq saqtaý ministrligi azamattardyń múddesin oilaýy tiis», - dedi Nurlan Saqýov.
«Atameken» UKP mamandary osy másele boiynsha biznes ókilderimmen birqatar kezdesý ótkizgen. Densaýlyq saqtaý ministri atyna portal jumysy jolǵa qoiylǵanǵa deiin burynǵy normalardy qaitarý qajettigine qatysty hat joldanǵan.
