Ishki naryqta baǵasy ósken shikizat pen materialdardy eksportqa shyǵarýǵa shekteý engiziledi. Bul týraly Úkimet otyrysynda Premer-Ministr Asqar mamin málim etti, dep habarlaidy QazAqparat.
«Azyq-túlikten basqa taýarlarǵa infliatsiia deńgeiin tejeý jónindegi sharalar aiasynda qajet bolsa, tapshylyq oryn alyp otyrǵan nemese ishki naryqta baǵasy ósken shikizat pen materialdardy eksportqa shyǵarýǵa shekteý engizý kózdeledi. Meditsinalyq qyzmetterdiń keshendi tarifterin jáne birqatar meditsinalyq taýarlardyń shekti baǵasyn aldyn ala bekitý qamtamasyz etiledi», - dedi A. Mamin.
Onyń aitýnysha, infliatsiia importy joǵary óndiristerdi ulǵaitý jóninde naqty sharalar qabyldanady, onyń ishinde qurylys materialdary men jeńil ónerkásip ónimderi de bar.
«Aqsha-kredit saiasatynyń aiasynda, infliatsiiaǵa qarsy sharalardy iske asyrýǵa, onyń ishinde ekonomikadaǵy ótimdilik kólemin baqylaýdy kúsheitý jolymen iske asyrýǵa nazar aýdarylatyn bolady. Bul sharalardyń bári biylǵy jyldyń sońyna deiin azyq-túlikten basqa taýarlar men aqyly qyzmetterdiń baǵasyn jedel túrde turaqtandyryp, infliatsiianyń jalpy deńgeiin baqylaýǵa múmkindik beredi», - dedi Úkimet basshysy.
Budan buryn habarlanǵandai, búgin Úkimet otyrysynda Infliatsiiaǵa qarsy áreket etý jónindegi sharalar kesheni maquldandy.
Asqar Mamin Áleýmettik mańyzy bar azyq-túlik satýshylar úshin jaldaý aqysy tómendetiletinin aitty.
