Qazaqstanda bir adamǵa 10 danadan artyq meditsinalyq maska satylmaýy múmkin, dep habarlaidy "Ult aqparat".
Bul týraly QR DSM «Dərilik zattar men meditsinalyq buiymdardy saraptaý ulttyq ortalyǵynyń» bas direktory Arnur Nurtaev aityp berdi.
«Koronavirýske bailanysty dúrligý saldarynan dárihanalyq uiymdar qaýymdastyǵymen birlesip, bir adamǵa 10 dana maska ǵana satýdy usynamyz. Bul adamdardyń myńdaǵan, on myńdaǵan maska alýyna jol bermeý úshin jasalýda. Kei adamdar dárihanadan múmkindiginshe myń dana maska alǵan. Densaýlyq saqtaý ministrligi kóp maska satýǵa tyiym sala almaidy. Biz tek dárihanalar jelisine usynym jasai alamyz. Olar da dúrligý máselesin sheshýge tyrysyp jatyr», - dedi spiker Ortalyq kommýnikatsiialar qyzmetinde tilshilerge bergen suhbatynda.
Buǵan deiin A. Nurtaev elimizde 1 mln dana meditsinalyq maska qalǵanyn jáne suranystyń 30 mln danaǵa deiin óskenin aitqan edi.
Onyń aitýynsha, otandyq meditsinalyq betperde óndirýshiler bir aida 6 millionnan astam nemese kúnine 180-200 myńǵa jýyq maska shyǵarady. Bul buiymdar eń aldymen memlekettik meditsinalyq mekemelerge jiberiledi.
Sonymen birge, vedomstvoaralyq komissiia otandyq kásiporyndar óndirgen maskalardy el aýmaǵynan shyǵarýǵa tyiym salǵan. Bul tyiym áli de óz kúshinde.
