Májilistiń jalpy otyrysynda depýtat Dúisenbai Turǵanov meditsinalyq qaldyqtardy jinaýdy retke keltirý kerektigin aitty. Bul qazaqstandyqtardyń densaýlyǵy men qorshaǵan ortaǵa aitarlyqtai qaýip tóndiredi.
Bul týraly májilismen elimizdiń Premer-Ministriniń birinshi orynbasary Roman Skliardyń atyna joldaǵan depýtattyq saýalynda kóterdi, dep habarlaidy QazAqparat.
D.Turǵanovtyń aitýynsha, meditsinalyq qaldyqtardyń ósý problemasy, ásirese, búginde koronavirýs pandemiiasy kezinde elimiz úshin óte ózekti. Meditsina qaldyqtarymen durys jumys istemeý halyqtyń densaýlyǵyna qaýip týdyrady. Bir ret qoldanylatyn shpritsterdi, tamyzǵyshtardy, tańǵyshtardy dezinfektsiialaý rejiminiń buzylýyna bailanysty dezinfektsiialanbaǵan qaldyq meditsina mekemeleriniń qoqys konteinerlerine tastalady. Bul odan ári ártúrli infektsiialardyń paida bolý jáne taralý qaýpin týdyrady.
Sonymen qatar, depýtat meditsina qaldyqtaryn óńdeý jáne kádege jaratý qorshaǵan ortaǵa patogendi nemese ýly lastaýshy zattardy shyǵarý arqyly janama túrde densaýlyqqa qaýip tóndirýi múmkin ekenin aitty.
D.Turǵanovtyń sózine qaraǵanda, Densaýlyq saqtaý, Ekologiia, geologiia jáne tabiǵi resýrstar ministrlikteri tarapynan jasalyp jatqan sharalar jetkiliksiz ekeni anyq. Atap aitqanda, sapasyz kádege jaratý sebepteriniń biri atalǵan qyzmetterdi litsenziialaýǵa jatatyn qyzmet túrleriniń tizbesinen alyp tastaýǵa qatysty bolyp otyr. Alaida ministrlik áli de zańnamaǵa tiisti ózgerister engizýge bastama kótergen joq.
Onyń paiymynsha, mundai kásiporyndarǵa Ekologiialyq kodekske sáikes belgili bir talaptar qoiylýy tiis.
«Bul talaptar oryndalyp jatyr ma, ony kim baqylaidy? Qaita óńdeý qyzmetin usynatyn kompaniialarda tiisti qondyrǵylar bar ma jáne olar qajetti talaptarǵa sai ma? Meditsina qaldyqtaryn kádege jaratý erejelerin buzǵany úshin qoldanylatyn jazalar qanshalyqty tiimdi?» – dep surady depýtat.
Dúisenbai Turǵanov osyǵan bailanysty meditsina qaldyqtaryn kádege jaratý boiynsha qyzmet kórsetetin kásiporyndardyń qyzmetine baqylaýdy kúsheitý, naqty standarttar ázirleý arqyly qajetti qural-jabdyqtardy kádege jaratý boiynsha qyzmet kórsetetin kásiporyndarǵa qoiylatyn talaptardy kúsheitý, sondai-aq qajetti qujattardy ázirleý qajet dep sanaidy.
