Meditsina jáne farmatsevtika qyzmetkerleriniń kásibi qyzmetine aralasýǵa tyiym salynady. Bul týraly QR Densaýlyq saqtaý ministri Eljan Birtanov aitty, dep habarlaidy "Ult aqparat".
«Meditsina kadrlarynyń biliktiligin arttyrý maqsatynda: kadrlardy úzdiksiz kásiptik damytý, onyń ishinde menshik nysanyna qaramastan meditsinalyq uiymnyń - jumys berýshiniń esebinen biliktilikti arttyrý; meditsina qyzmetkerlerin sertifikattaý; rezidentýrada jáne kásibi qyzmettiń bastaǵan kezde mindetti tálimgerlik kózdeledi», - dedi ol Májiliste «Halyq densaýlyǵy jáne densaýlyq saqtaý júiesi týraly» Kodeks jobasynyń jańa redaktsiiasyn tanystyrý barysynda.
Onyń atap ótýinshe, memleket tarapynan áleýmettik qoldaýdy qamtamasyz etý úshin biliktilik deńgeiine sáikes keletin yntalandyrý tólemderin usyný, sondai-aq meditsina jáne farmatsevtika qyzmetkerleriniń jergilikti biýdjet qarajaty esebinen áleýmettik qoldaýǵa arnalǵan basym quqyqtaryn bekitý qarastyrylady. «Meditsinalyq oqiǵa» uǵymy jáne ony aiqyndaý tetikteri engiziledi. Meditsina jáne farmatsevtika qyzmetkerleriniń kásibi qyzmetine aralasýǵa tyiym salynady.
«Kórsetilgen túzetýlerdi qabyldaý nátijesinde kadrlardy daiarlaý sapasy artyp, halyqtan túsetin shaǵymdar sany tómendeidi. Meditsina jáne farmatsevtika qyzmetkerleriniń mártebesi artady. Patsientterdiń qaýipsizdigi joǵarylaidy. Densaýlyq saqtaý qyzmetkerleriniń quqyqtary men zańdy múddeleriniń buzylýynyń aldyn kesý, aldyn alý jáne boldyrmaý múmkindigi paida bolady», - dedi ministr.
