Memlekettik hatshy Qyrymbek Kósherbaev QR Prezidenti janyndaǵy Sybailas jemqorlyqqa qarsy is-qimyl máseleleri jónindegi komissiianyń otyrysyn ótkizdi, dep habarlaidy Aqorda.
QR Memlekettik hatshysy Qyrymbek Kósherbaevtyń tóraǵalyǵymen Qazaqstan Respýblikasy Prezidenti janyndaǵy Sybailas jemqorlyqqa qarsy is-qimyl máseleleri jónindegi kezekti komissiia otyrysy ótti. Jiynda pandemiiamen kúresýge bólingen qarajattyń tiimdi jumsalýy jáne densaýlyq saqtaý ministrligindegi sybailas jemqorlyqqa qarsy qabyldanyp jatqan sharalar jaiy talqylandy.
Memleket basshysy Qasym-Jomart Toqaevtyń tapsyrmasymen álemdi jailaǵan indetpen kúresý úshin tiisti sharalar qolǵa alynyp, biýdjetten aýqymdy qarajat bólindi. Bul qarajat negizinen naýqastardy emdeýge, el azamattaryn qajetti dári-dármek, qorǵanysh quraldarymen, meditsinalyq qural-jabyqpen qamtýǵa jáne dárigerlerdiń jalaqysyna ústemaqy qosýǵa baǵyttaldy.
QR Tuńǵysh Prezidenti – Elbasy N.Á.Nazarbaev otandastyrymyzdy qabyldanǵan sharalardy qoldaýǵa shaqyrdy. Sondai-aq koronavirýs indetine qarsy is-qimyl máseleleri Qaýipsizdik keńesiniń otyrysynda qaraldy.
Pandemiiaǵa qarsy qabyldanǵan sharalar indettiń betin qaitarǵanymen, quqyq qorǵaý jáne tiisti baqylaýshy mekemeler biýdjetten bólingen qarjynyń keide tiimsiz paidalanylǵanyn anyqtady. Atap aitqanda, mundai jaǵdai meditsinalyq qural-jabdyqtardy satyp alý, emhana qyzmetkerlerine ústemaqy tóleý kezinde laýazymdy tulǵalardyń tarapynan oryn alǵan.
Sonymen qatar Sybailas jemqorlyqqa qarsy kúres agenttigi densaýlyq saqtaý ministrligi men oǵan qarasty mekemelerdegi memlekettik satyp alý kezindegi sybailas jemqorlyq táýekelderin anyqtady. Al Qarjylyq monitoring agenttigi dári-dármek pen urlyqy ónimderdi alyp-satý boiynsha aýqymdy jumys júrgizgen. Qarjy ministrligi meditsina qyzmetkerlerine ústemaqy tóleý barysynda birqatar zańsyzdyqtar oryn alǵanyn áshkereledi.
Jiynda koronavirýspen kúreske bólingen qarjynyń tiimdi jumsalýy boiynsha jáne sybailas jemqorlyqqa qarsy qabyldanǵan is-qimyl sharalary jóninde QR Densaýlyq saqtaý ministri A.Tsoi jáne birqatar oblys ákimderi baiandama jasady.
Komissiia otyrysynda jaýapty organ basshylaryna jemqorlyqty anyqtap, aldyn-alýmen qatar, Memleket basshysynyń turmystyq jemqorlyqty joiý jónindegi tapsyrmasyn oryndaý úshin tiisti sharalar qabyldaý tapsyryldy.
Jiyn sońynda Memlekettik hatshy kóterilgen máseleler boiynsha naqty tapsyrlar berip, oryndalýy qatań baqylaýǵa alynatynyn jetkizdi.
