Densaýlyq saqtaý ministrliginiń jaýapty hatshysy Botagóz Jaqselekova meditsinalyq qyzmetkerlerge qosymsha aqyny tóleýdiń ashyqtyǵy boiynsha komissiia qurylǵanyn málim etti, dep habarlaidy QazAqparat.
«Óńirlermen aýqymdy jumystardyń atqarylǵanyn aita ketý kerek. Sonymen, syiaqy alatyn keibir adamdar boiynsha meditsinalyq uiymdardyń basshylary komissiiaǵa aty-jónderi kórsetilgen tizim beredi. Bul jumystyń ashyqtyǵy men belsendiligi úshin buiryq boiynsha jedel basqarý shtabynyń bastyǵy nemese onyń orynbasarynyń basshylyǵymen jergilikti atqarýshy organnyń janynan komissiia qurylady. Onyń quramyna oblystyń bas sanitarlyq dárigeri, densaýlyq saqtaý, jumyspen qamtý jáne áleýmettik qorǵaý basqarmalarynyń, úkimettik emes qurylymdardyń ókilderi kiredi», - dedi Botagóz Jaqselekova.
Tólem Áleýmettik-meditsinalyq saqtandyrý qorynyń esebinen beriledi.
«Búgingi kúni kórsetilgen soma, iaǵni naýryz aiyndaǵy shamamen 5,2 mlrd teńge boiynsha qosymsha kelisim men qarjylandyrý arqyly densaýlyq saqtaý uiymdarymen kelisimshart jasaldy. 8 sáýirden bastap atalǵan uiymdar atalǵan somany aýdaryp jatyr. Keshe bes aimaq óz qyzmetkerleriniń jalaqy kartasyna syiaqyny aýdardy. Qalǵan aimaqtar bul jumysty aiaqtap jatyr», - dep sendirdi Densaýlyq saqtaý ministrliginiń jaýapty hatshysy.
Ol óz sózinde syiaqy beriletin meditsinalyq qyzmetkerler úsh topqa bólinetinin aityp ótti.
«Birinshi táýekel tobyndaǵy barlyq qyzmetkerge 850 myń teńgeden aspaityn, biraq jumys istegen merzimine sáikes bonýs beriledi. Bul obektivti tásil. Iaǵni, bir ai jumys istegennen keiin juqpaly aýrýlar jónindegi maman tolyq mólsherde alady. Al keiinirek qosylǵan jáne úsh-bes kún ǵana jumys istegen áriptesi jumys istegen merzimine sáikes bonýsqa ie bolady», - dep túsindirdi ol.
Ekinshi qaýip tobyna farmatsevtikalyq aýrýhanalardyń dárigerleri, orta jáne kishi meditsina qyzmetkerleri, dárigerler men jedel járdem feldsherleri, onyń ishinde aýrýhanaǵa deiingi ambýlatoriialyq uiym kiredi. Olardyń ishinde dárigerler men feldsherler, jedel járdem qyzmetkerleri de bar. Osy táýekel tobyndaǵy syiaqynyń mólsheri 425 myń teńgeden aspaidy.
«Úshinshi qaýip tobyna karantindik aýrýhanalardyń dárigerleri, orta jáne kishi meditsina qyzmetkerleri, jedel járdem brigadasynyń júrgizýshileri, sondai-aq zerthana mamandary, sanitarlyq-epidemiologiialyq qyzmet qyzmetkerleri (212 myń teńge) enedi», - dedi ol.
