Foto: TJD
Medeýdegi órtti sóndirý kezinde órtsóndirýshi qaza boldy, - dep habarlaidy "Ult aqparat" TJM baspasóz qyzmetine silteme jasap.
Búgin túnde qyzmettik boryshyn atqarý kezinde, Almaty qalasyndaǵy Ile-Alataý memlekettik ulttyq tabiǵi parkiniń aýmaǵyndaǵy taý baýraiynda órtti sóndirý boiynsha jedel toptyń quramynda bolyp, janyp jatqan aǵash dińiniń qulaýynan alǵan jaraqattardyń saldarynan Almaty qalasy TJD Órt sóndirý jáne avariialyq-qutqarý jumystary qyzmetiniń qyzmetkeri, 7-ÓSB aǵa órt sóndirýshi-qutqarýshysy azamattyq qorǵaý serjanty Qurmanbekov Arslan Joldasbekuly qaza tapty.
Ol 1994 jyly 23 tamyzda Almaty oblysynda dúniege kelgen. Azamattyq qorǵaý organdarynda 2015 jylǵy 14 jeltoqsannan bastap jumys istegen.
"Tótenshe jaǵdailar ministrligi Arslan Joldasbekulynyń týystary men jaqyndaryna kóńil aitady. Óz isiniń mamany retinde ol týraly jaqsy estelikter bizdiń júregimizde máńgi qalady.
Arslan jaýapty qyzmetker, kásibi kúresker jáne bilikti maman boldy. Jumysta ol eńbekqorlyǵy, ádildigi jáne mamandyqqa degen súiispenshiligi úshin baǵalandy.
TJM qaza tapqan órt sóndirýshiniń otbasyna jan-jaqty kómek pen qoldaý kórsetedi" - delingen vedomstvo habarlamasynda.
