Májiliske jańadan kelgen depýtattar Gúlshara Ábdiqalyqova, Nurjan Áshimbetov jáne Juldyz Omarbekova májilistiń besinshi sessiiasynyń alǵashqy otyrysynda ant berdi. Al belgili akter Nurlan Álimjanov ant berýge kelgen joq, dep habarlaidy Sputnik Qazaqstan.
Tanymal akter ári ánshi, "Elbasy joly" kinoepopeiasynda Nursultan Nazarbaevty somdaǵan Nurlan Álimjanov jaqynda depýtat mandatyn alǵan edi. Alaida ol búgin májilistiń jańa sessiiasynyń alǵashqy otyrysyna qatysqan joq. Onyń sebebin bilý úshin ózine habarlasqanymyzda "Buǵan qatysty ázirge eshteńe aita almaimyn, bir aptadan keiin habarlasyńyz, barlyq suraqqa jaýap beremin" dep qysqa qaiyrdy.
Al qalǵan úsh jańa depýtat saltanatty túrde adal qyzmet etýge ant berdi.
"Qazaqstan halqyna adal qyzmet etýge, Qazaqstan Respýblikasynyń tutastyǵy men táýelsizdigin nyǵaitýǵa, onyń Konstitýtsiiasy men zańdaryna qatań baǵynýǵa, depýtattyń ózime júktelgen mártebeli mindetin adal atqarýǵa ant etemin", - dedi depýtattar.
Osydan keiin depýtattardyń biraýyzdan qabyldaǵan sheshimimen Gúlshara Ábdiqalyqova májilistiń áleýmettik-mádeni damý komitetiniń tóraǵasy bolyp sailandy. Buǵan deiin komitetti Gúlnár Iksanova basqarǵan edi. Ol otstavkaǵa ketý týraly ótinishine bailanysty májilisten ketti.
Al Nurjan Áshimbetov agrarlyq máseleler komitetine, Juldyz Omarbekova zańnama jáne sot-quqyqtyq reforma komitetiniń quramyna sailandy.
