QR Parlamenti Májilisiniń depýtaty Saýytbek Abdrahmanov jedel járdem qyzmetine qatysty el turǵyndarynyń usynysyn jariialady, dep habarlaidy QazAqparat.
Atalǵan máselege bailanysty QR Premer-Ministriniń orynbasary Berdibek Saparbaevtyń atyna depýtattyq saýal joldandy.
«Biraz ýaqyttan beri «jedel járdem» qyzmeti ortalyqtandyryldy. Búginde kez kelgen ótinim aldymen oblys ortalyǵyna jetkiziledi, sonda qabyldanyp, tirkelgennen keiin ǵana aýdandaǵy «jedel járdem» qyzmetine oblystan tapsyrma beriledi. Sondai tapsyrma alynbaiynsha «jedel járdem» aýyr naýqasqa attana almaidy. Munyń búkil oblystaǵy jaǵdaidy bir ýysta ustap otyrýǵa múmkindik beretinine, tapsyrysty úilestirýde ózindik artyqshylyǵy barlyǵyna daý aita almaspyz, biraq ýaqyttan utyldyratynyna, al bailanys bolmai nemese ótinim alýǵa tiisti adam ornynan tabylmai qalǵan jaǵdaida qaterli ekendigine kúmán joq», - dep toqtaldy S. Abdrahmanov QR Parlamenti Májilisine Qazaqstan halqy Assambleiasynan sailanǵan depýtattar saýalyn jariialaý barysynda.
Onyń aitýynsha, sailaýshylar «jedel járdem» qyzmetin úilestirýdi burynǵydai aýdandyq densaýlyq saqtaý bólimderiniń qaramaǵynda qaldyrýdy usynady.
