Májilistiń jalpy otyrysynda depýtat Jambyl Ahmetbekov qurylys materialdary baǵasyn retteýge qatysty usynys aitty, dep habarlaidy "Ult aqparat".
Úkimet basshysynyń atyna joldanǵan depýtattyq saýalda Qazaqstan Respýblikasynyń qurylys naryǵynda qurylys materialdarynyń jappai qymbattaýy baiqalyp otyrǵandyǵy, qurylys materialdary qunynyń ósýi turǵyn úi qunynyń qymbattaýyna ákep soqqany atalyp ótken. Sáikesinshe, bul memlekettik biýdjet esebinen salynatyn mektepter, aýrýhanalar jáne basqa da áleýmettik obektiler qurylystarynyń da qymbattaýyna alyp keletini belgili.
Ahmetbekovtyń aitýynsha, qazirgi kezde Qazaqstanda qurylys maýsymynyń bastalýy qarsańynda belgili bir salalarda kadrlar tapshylyǵy qalyptasty. Qurylys salasynda kadrlardyń jetispeýshiligi qatty sezilýde, eń aldymen, ártúrli jumysshylar, tas qalaýshylar, árleýshi-syrlaýshylar jáne t.b. mamandar jetispeidi.
Kadr jetispeýshiliginiń negizgi sebepteriniń biri qurylys salasy men tehnikalyq jáne kásibi bilim berý mekemeleriniń arasyndaǵy ózara bailanystardyń bolmaýynan bolyp otyr.
«Kóptegen kolledjder oqýshylardyń kásibi baǵdaryn shyńdamaidy, olarǵa obektilerde kásibi praktikadan ótý múmkinshilikterin jasamaidy. Búgingi tańda Qazaqstan Qurylysshylar odaǵynyń aqparatyna qaraityn bolsaq, elimizdiń qurylys salasyna 242 000 maman jetispeidi», - dedi depýtat.
Osyǵan bailanysty, eńbek naryǵyndaǵy jetispeýshilikti tolyqtyrý qajet jáne jumys berýshilerge qolda bar kadrlyq problemalardyń ornyn toltyrý úshin Qazaqstan Respýblikasynyń Úkimeti myna máselelerdi qarastyrýy tiis:
- Qazaqstanda turǵyn úi qunynyń ósýin tejeý maqsatynda qurylys materialdary naryǵynda baǵa belgileýdi rettep otyrý múmkindikterin izdestirý;
- Qyzmetkerlerdiń Qaǵidalarynyń 5-sanatyna «sheteldikterdiń jáne azamattyǵy joq adamdardyń erekshe sanaty» - tómen bilikti nemese biliktiligi joq qyzmetkerler» degen tolyqtyrý engizý;
- Jumys berýshilerge qurylys-montaj jumystaryn júrgizý kezeńinde sheteldik qyzmetkerdi Qazaqstan aýmaǵynda bolý ýaqytyn jobanyń merzimine sáikes ulǵaitýyna múmkindik berý;
- Pilottyq jobany iske asyrý arqyly obektilerdi salý kezinde FIDIC qaǵidattary men erejelerin engizý;
- Tehnikalyq jáne kásibi bilim berý mekemelerindegi oqý protsesine óndiristik oqýlardy engizý jónindegi jáne oqýshylardyń óndiristik praktikalardan ótýi men olardy dýaldyq oqytý printsipterimen tolyqtyrý jónindegi jumystardy úilestirýdi qamtamasyz etý.
