QR Premer-Ministriniń orynbasary Eraly Toǵjanov «Teńiz» jobasynan bosaityn 39 myń jumysshynyń keleshegi týraly pikir bildirdi, dep habarlaidy QazAqparat.
Bul máseleni Májilistiń jalpy otyrysynda depýtat Sálimjan Naqpaev kóterdi.
«Bizge Atyraý qalasynda jumys isteitin «Teńizshevroil» kompaniiasynyń qyzmetkerleri habarlasty. Jaqynda «Teńiz» kenishinde iri jobanyń qurylysy aiaqtalady jáne sondaǵy jumysshylar bosatylady. Jalpy, kompaniianyń boljamy boiynsha, «Teńiz» kenishinde «Bolashaq» keńeitý jobasy qurylysyn aiaqtap, 2022 jyly shamamen 39 500 adam qysqarady. Olardyń 37 100-i – qazaqstandyq kadrlar», - dedi depýtat.
Onyń aitýynsha, atalmysh qysqarý Qazaqstannyń barlyq óńirindegi eńbek naryǵyna áser etedi.
«Sol sebepti qazir óz óńirlerine oralatyn qyzmetkerlerdi jumysqa ornalastyrý tártibi qarastyrylǵan ba? «Teńizde» qazaqstandyqtarmen birge 2400 sheteldik kadrlar da qysqartylmaqshy. Jumyspen qamtamasyz etý kezinde basymdyq bizdiń qyzmetkerlerge berile me, álde shetelden kelgen qonaqtarǵa berile me», - dep surady Májilis ókili.
Suraqqa jaýap bergen QR Premer-Ministriniń orynbasary Eraly Toǵjanov bul másele kún tártibinde turǵanyn atap ótti.
«Ótkende «Teńizshevroil» basshysymen tikelei kezdesý bolǵan. Sol kezdesýde Energetika jáne Eńbek ministrlikterimen «TShO» arasynda arnaiy memorandýmǵa qol qoiyldy. Ol memorandým boiynsha, 39 myń adamnyń bári bir kezeńde jumyssyz qalmaidy. Olar qazir 4 kezeńge bólindi. 2,7 myń adam birinshi toqsanda, 9 myńy ekinshi toqsanda, 11 myńy úshinshi toqsanda, 13 myńy tórtinshi toqsanda bosatylady dep otyrmyz», - dedi Úkimet basshysynyń orynbasary.
Sondai-aq, ol «Teńiz» jobasyna shetelden tartylǵan azamattar elderine qaitatynyn atap ótti.
«Ózińiz bilesiz, Atyraý qalasynda «NSS» komp a niiasynyń birneshe jobasy bar. 17,5 myń jumyskerimizdi sol jaqqa tartyp jatyrmyz. Ekinshiden, ol jerde jumys isteitinderdiń 40 paiyzy ǵana Atyraýdyń óziniń halqy. Qalǵandary negizinen 5 óńirden tartylǵan. Sol óńirlermen qazir qoian-qoltyq jumys istep, baratyn azamattardyń eline qaitýyn, qaita daiarlaý máselelerin de kún tártibine qoiyp, solarmen kúndelikti júieli jumys júrgizilip jatyr.
