Parlament Májilisiniń jalpy otyrysynda depýtat Baýyrjan Sartbaev jańa mektepterdiń qurylysyn baqylaý quzyrettiligin Bilim jáne ǵylym ministrligine berýdi surady, dep habarlaidy QazAqparat.
«Nur Otan partiiasy fraktsiiasynyń depýtattary jazǵy halyqpen kezdesý aiasynda bilim berý obektileriniń qurylysymen tanysyp, búgingi tańda memlekettik qarajat esebinen mektep qurylysynyń sapasyna, onyń ishinde jańa bilim mazmunyna sáikestigine, oqýshylardyń fýnktsionaldy saýattylyǵyn damytýyna, pándik kabinettermen jabdyqtalmaýy, qosymsha bilim berý jumysyn uiymdastyrýǵa múmkindikterdiń qurylys kezinde qarastyrylmaýyna qatysty alańdaýshylyǵyn bildiredi. 2021 jyldyń 7 qyrkúieginde Qazaqstan Respýblikasy Parlament Májilisiniń Mádeni-áleýmettik damý komitetine Biýdjetti talqylaý aiasynda 800 mekteptiń qurylysynyń barysy týraly baiandaǵan QR Bilim jáne ǵylym vitse-ministri B. Asylovanyń: «Bilim jáne ǵylym ministrliginde atalǵan mektepterdiń qurylysynyń barysyn kórý jáne baqylaý, kún saiyn monitornig júrgizý quzyrettiligi joq. Bul týraly birneshe márte aityp kelemin. Bizde mektepterdiń daiyndyq deńgeiin qaraityn tipti qurylysshy mamandar da joq», – degen jaýabynan keiin alańdaýshylyq odan ári tereńdei tústi», - dedi B. Sartbaev Premer-Ministrdiń orynbasary Eraly Toǵjanovtyń atyna joldaǵan saýalynda.
Osy oraida ol jańa memlekettik jalpy bilim beretin mektepterdiń tiisti qural-jabdyqtarsyz, atap aitqanda, himiia, fizika, biologiia, geografiia jáne úiirme kabinetterinsiz paidalanýǵa berilýi qanshalyqty qisyndy ekenin surady. Osy sebepti oqý qyzmetine litsenziiany ýaqytynda ala almaityn mysaldar bar. Sonymen qatar, jalpy bilim beretin mektepter jan basyna shaqqandaǵy qosymsha biýdjettik qarajatty paidalaný arqyly obektiniń bastapqy eksplýatatsiiasy kezeńinde jabdyq satyp alýǵa májbúr. Alaida, bul másele memlekettik-jekemenshik áriptestik jaǵdaiyndaǵy mektepter qurylysynda jáne jeke investitsiialardyń mektep qurylysynda oń sheshilgen.
«Memlekettik mektepterde qarapaiym halyqtyń balalary oqityn eskersek, bul bilim berý mekemelerinde bastapqy qurylysy kezinde pándik kabinetterdi josparlaýǵa, sol arqyly oqý protsesin sapaly uiymdastyrýǵa, balanyń tulǵasyn jan-jaqty damytýǵa ne kedergi?
Osyǵan bailanysty «Nur Otan» partiiasynyń músheleri ýákiletti organǵa usynys jasady:
- Birinshiden, oqýshylardyń oryn tapshylyǵy deńgeiiniń naqty qajettilikterine sáikes mektepterdi jobalaý, qurylysyn boljaý jáne jańartýdy saraptamalyq sapaly deńgeide josparlaý qajet.
- Ekinshiden, aýyldyq jerlerdegi modýldik mektepterdiń tiptik jobalaryn daiyndaý boiynsha túsinikteme berýdi kerek.
- Úshinshiden, memlekettik qarajat esebinen mektepterdiń qurylysy kezinde qolaily bilim berý ortasyn qurýdy eskerý qajet. Mektep basshylary ǵimarat salý kezinde 2 sport zaldy qarastyrýdy suraidy. Ol úshin, normativtik quqyqtyq aktilerge ózgerister men tolyqtyrýlar engizý, bilim berý uiymdaryn pándik kabinetter jáne qosymsha bilim alýǵa arnalǵan qural-jabdyqtar ári jihazdarmen tolyq jabdyqtalýdy qamtamasyz etýdi qarastyrý qajet.
- Tórtinshiden, oqýshylardyń oryn tapshylyǵyn sheshýge baǵyttalǵan zamanaýi bilim berý ortasyn qurý jáne sapaly bilim alýyna teń qoljetimdiligin qamtamasyz etý máselesi Bilim jáne ǵylym ministrliginiń qaraýynda ekendigin eskerip, jańa mektepterdiń qurylysyn baqylaý quzyrettiligin de osy ortalyq memlekettik organǵa berý suraldy.
