Foto: «AMANAT» partiiasynyń baspasóz qyzmeti
Búgin «AMANAT» partiiasynyń kezekten tys XXV Sezi ótti. Is-sharaǵa 2000-nan astam adam qatysty. Olardyń ishinde Saiasi keńes músheleri, Májilistiń VII shaqyrylymynyń burynǵy depýtattary, óńirlerden kelgen delegattar, partiianyń «Jastar Rýhy» jastar qanatynyń músheleri, sondai-aq sarapshylar, úkimettik emes uiymdardyń, BAQ ókilderi jáne basqalar bar.
«AMANAT» Tóraǵasy Erlan Qoshanov óz sózinde az ǵana ýaqyttyń ishinde partiia qoǵamnyń jańa suranystaryna sáikes ózgergenin atap ótti.
«Partiiaǵa túpkilikti transformatsiia jasap, qurǵaq ýáde men jalań urandardan aryldyq. Sózden naqty iske kóship, saiasi alańda da, qoǵamdyq jumysta da barynsha ysyldyq, shyńdaldyq. Shyn máninde Memleket basshysynyń qoǵamdyq tiregine, eldegi túbegeili reformalardyń qozǵaýshy kúshine ainala bildik. Eń bastysy, «AMANAT» partiiasy qysyltaiań sátterde árdaiym halqymyzben birge boldy», - dedi ol.
«AMANAT» partiiasy barlyq deńgeidegi máslihattarǵa 3821, Májiliske 119 kandidat usyndy. Elimizdiń barlyq ókildi organyna usynylatyn «AMANAT» partiialyq quramasy 75%-ǵa jańardy. Olar – Prezident reformalary men partiia baǵytyn júzege asyrýǵa qabiletti jarqyn kóshbasshylardyń jańa toby. Bul quramda barlyq óńirdiń, barlyq salanyń ókilderi bar. Naǵyz memleketshil, patriot azamattar. Bizdiń úmitkerler partiiany ádil de taza jeńiske bastaidy dep kámil senemin. Óitkeni, olardyń artynda ózderińizdei adal partiialastar men qalyń orman halqymyz bar», - dedi Erlan Qoshanov.
Óz kezeginde, Májilistiń VII shaqyrylymynyń burynǵy depýtaty Edil Jańbyrshin ekonomikasy myqty ádil qoǵam qurý úshin eń aldymen aýyldy aiaǵynan turǵyzý qajet dep esepteidi.
«Aýylda halqymyzdyń elý paiyzy turady. «AMANAT» partiiasy árqashan aýylǵa asa mán berip, ondaǵy aǵaiynnyń esh nársege muqtaj bolmaýyn qamtamasyz etýdi ózine mindet etip otyr. Ulttyq bolmysymyzdy saqtaýdyń, halqymyzdy tarydai shashyp almaýdyń bir joly – ol aýyldardyń infraqurylymyn damytý. Osy maqsatty iske asyrý úshin «AMANAT» partiiasy aldaǵy bes jylda júieli jumys isteidi. Sondai-aq, jeke sharýashylyqtardy qoldaý úshin «Aýyl amanaty» jobasyn bastap kettik», - dedi ol.
22 jasynda Almaty qalasy máslihatynyń ótken shaqyrylymynyń depýtaty bolǵan paralimpiadashy Serik Esmatov qoǵamnyń igiligi úshin eńbek etý árbir qazaqstandyqtyń qolynan keletinin atap ótti.
«Eki aiaǵymnan aiyrylsam da, ómirimdi ózgerte aldym jáne elimizdi jaqsy jaqqa ózgertkim keledi. Zamanaýi jáne Ádiletti Qazaqstandy qurý isine búkil qoǵamnyń atsalysýy mańyzdy», - dedi Serik Esmatov.
Sondai-aq, Sezde jýrnalist, Almaty qalasy máslihatynyń VII shaqyrylymynyń eks-depýtaty Sergei Ponomarev, «Jastar Rýhy» jastar qanatynyń belsendisi Ariana Belobjitskaia, Túrkistan oblysy Saryaǵash aýdany máslihatynyń depýtattyǵyna kandidat Juldyz Jumanqyzy jáne aqyn Almas Ahmetbekuly sóz sóiledi.
Pikir almasýdan jáne daýys berý rásiminen keiin «AMANAT» partiiasynyń kezekten tys XXV Seziniń sheshimimen partiialyq tizimder men birmandatty aýmaqtyq sailaý okrýgteri boiynsha sailanatyn Májilis depýtattyǵyna kandidattardyń tizimin jáne partiianyń Sailaýaldy baǵdarlamasyn bekitti.
Sailaýaldy baǵdarlamanyń tolyq mátini úgit-nasihat kezeńiniń alǵashqy kúninde jariialanyp, partiianyń saitynda ornalastyrylady.
