Búgin QR Parlamenti Májilisinde týristik salany damytý týraly úkimet saǵaty ótti. Osy oraida oryssha sóz sóilegen oblys ákimderiniń orynbasarlaryn depýtat Baqytbek Smaǵul synady, dep habarlaidy Baq.kz tilshisi.
Májilis qabyrǵasynda týristik salany damytý týraly úkimet saǵatyna QR Mádeniet jáne sport ministri Arystanbek Muhamediuly, sondai-aq birqatar ministrlerdiń orynbasarlary qatysty. Úkimet saǵatynyń sońynda jergilikti atqarýshy organdardan Astana men Almaty qalalary, Almaty jáne Soltústik Qazaqstan oblystary ákimderiniń orynbasarlaryna sóz berildi. Astana qalasy ákiminiń orynbasary Ermek Amanshaev qana memlekettik tilde sóilese, qalǵan ákimder májilismen Baqytbek Smaǵuldyń synyna ilikti.
«Birinshiden, eki oblys ákimi orynbasarynyń osy jerge kelip memlekettik tilde sóilemegeni — uiat dúnie. Olar álde memlekettik tildi mensinbei, bilmegeni me, álde Elbasynyń maqsat-muratyn qulaǵyna ilmegeni me, osyny túsinbei otyrmyn. Uiat nárse! Basshylaryńyz aptal azamattar! Al sizder Parlamentke kelip otyrsyzdar, bir aýyz amandasý da joq. Uiat emes pe, adamnyń namysy qaida?», - dep synady depýtat.
Májilis tóraǵasynyń orynbasary Gúlmira Isimbaeva kez kelgen qazaqstandyqtyń oiyn úsh tilde jetkizýge quqyǵy bar dep basý aitty.
«Baqytbek, eki tilde, tipti úsh tilde sóileýge árqaisysymyzdyń quqyǵymyz bar. Qansha til bilemiz, sonsha tilde. Endi kelgen azamattardyń barlyǵy qazaq tilin bilmeidi dep aita almaimyz, bári biledi. Óz oilaryn jetkizý úshin bizdiń aýdarmaǵa kishkene senińkiremei, orys tilinde sóilegeni ǵoi», - dedi ol.
