Parlament Májilisiniń depýtattary «Qazaqstan Respýblikasynyń keibir zańnamalyq aktilerine jer qatynastaryn damytý máseleleri boiynsha ózgerister men tolyqtyrýlar engizý týraly» zań jobasyn talqylaityn bolady, dep habarlaidy QazAqparat.
«Atalǵan zań jobasy Memleket basshysynyń tapsyrmasyn oryndaý maqsatynda jáne jer qatynastary salasyndaǵy negizgi máselelerdi talqylaý ári olar boiynsha usynymdar ázirleý úshin arnaiy qurylǵan Jer reformasy jónindegi komissiia qyzmetiniń qorytyndysy boiynsha ázirlendi. Atap aitqanda, zań jobasymen otandyq jer paidalanýshylar úshin aýyl sharýashylyǵy maqsatyndaǵy jerlerdi jalǵa berý institýtyn jetildirý kózdelgen. Sonymen qatar, qazaqstandyqtarǵa aýyl sharýashylyǵy jerlerin jekemenshikke berý jónindegi Jer kodeksi normalarynyń qoldanylýyn bes jylǵa keiinge qaldyrý usynyldy», - dedi Májilistiń Agrarlyq máseleler komitetiniń tóraǵasy Erlan Barlybaev palatynyń jalpy otyrysynda.
Onyń aitýynsha, zań jobasy aiasynda jerdi paidalanýǵa memlekettik baqylaý kúsheitildi.
«Jaiylymdyq jerlerdiń aýmaqtary anyqtaldy jáne ashyq jer kadastry kózdelgen. Agrarlyq máseleler komiteti atalǵan zań jobasy boiynsha qorytyndy ázirleýge daiyn», - dedi depýtat.
Eske sala keteiik, biyl sáýir aiynyń sońynda Jer reformasy jónindegi komissiianyń otyrysynda jer ielgine qatysty normalarǵa belgilengen moratorii merzimin 5 jylǵa uzartý týraly sheshim qabyldandy.
