Parlament Májilisiniń jalpy otyrysynda «2022–2024 jyldarǵa arnalǵan respýblikalyq biýdjet týraly» zań jobasy maquldandy, dep habarlaidy QazAqparat.
«Úsh jylǵa arnalǵan respýblikalyq biýdjet jobasy Memleket basshysynyń tapsyrmalaryn jáne «Nur Otan» partiiasynyń sailaýaldy baǵdarlamasynyń barlyq mindettemelerin qamtidy. Biýdjet jobasyn qaraý barysynda onyń baǵyttary egjei-tegjeili talqylandy, sondyqtan negizgi parametrlerine qysqasha toqtalyp óteiin. Respýblikalyq biýdjet túsimderi biyldyń josparyna qaraǵanda 432 mlrd teńgege ulǵaia otyryp, 2022 jylǵa 13 trln teńge kóleminde boljanyp otyr. Respýblikalyq biýdjetke túsetin munai túsimderiniń úlesi birtindep azaiatyn bolady. Máselen, aǵymdaǵy jylǵy 43,6%-dan 2024 jylǵa qarai ol 28,6%-ǵa deiin tómendeidi», - dedi QR Qarjy ministri Erulan Jamaýbaev.
Onyń aitýynsha, Ulttyq qordan beriletin kepildendirilgen transfert 2022 jyly aǵymdaǵy jylmen salystyrǵanda 300 mlrd teńgege, al 2023 jáne 2024 jyldary taǵy 200 mlrd teńgege azaia otyryp, josparlanǵan. Kelesi jylǵa Ulttyq qordan beriletin nysanaly transfert 550 mlrd. teńge jáne 2023-2024 jyldarǵa 400 mlrd teńge mólsherinde aiqyndaldy.
«Munaiǵa qatysty emes túsimderdiń úlesi biylǵy 56,4%-ten 2024 jylǵa qarai 71,4%-ke deiin ósedi dep boljanǵan. Biýdjet tapshylyǵy 2022 jyly jalpy ishki ónimge 3,3%-dan 2024 jyly 2,5%-ǵa deiin kezeń-kezeńmen tómendeýmen josparlanyp otyr», - dedi ministr.
Onyń sózine qaraǵanda, shyǵystar kelesi jyly 15,9 trln teńgeni quraidy. Biýdjettiń áleýmettik baǵyty saqtaldy. Úsh jyldyq kezeńde áleýmettik sala shyǵystary 26,7 trln teńge bolady. Onyń ishinde 2022 jyly biyldyń deńgeiine qaraǵanda 643,2 mlrd teńgege ulǵaia otyryp, 8,1 trln teńgeni quraidy.
«Biýdjettiń jalpy kólemindegi bul shyǵystarynyń úlesi endigi jyly 50,8%-ǵa deiin ósedi. Shyǵystar kóleminiń kóp bóligi azamattardy áleýmettik qamsyzdandyrý men olarǵa kómek kórsetýge baǵyttalǵan. Densaýlyq saqtaý júiesin damytýǵa arnalǵan shyǵystar 2022-2024 jyldary 5,7 trln teńgeni, onyń ishinde 2022 jylǵa 1,8 trln teńgeni quraidy. Osy qarajat aiasynda meditsina qyzmetkerleriniń eńbekaqysyn ulǵaitý kózdelgen», - dedi Á. Erǵaliev.
Onyń sózine qaraǵanda, bilim jáne ǵylym júiesin damytýǵa 3 jylǵa 7 trln teńge, onyń ishinde 2022 jylǵa 1,8 trln teńge kózdelgen. Bul biyl bólingen qarajattan 477,1 mlrd teńgege artyq.
«Ekonomikanyń naqty sektoryn qoldaýǵa jáne damytýǵa arnalǵan shyǵystar orta merzimdi kezeńde 3,6 trln teńgeni, onyń ishinde 2022 jylǵa 2 trln teńgeni quraidy. Osy baǵyt aiasynda barlyq memlekettik baǵdarlamalardy iske asyrýǵa shyǵystar kózdelgen. Olar birtindep ulttyq jobalarǵa ulasatyn bolady», - dedi ministr.
Zań jobasyn talqylaý barysynda birqatar túzetýler engizildi. Túzetýlerdiń birinshi blogy Memleket basshysynyń biylǵy 1 qyrkúiektegi Joldaýyn qarjylyq qamtamasyz etýge baǵyttalǵan.
Máselen, 2022 jylǵa azamattyq qyzmetshilerdiń jekelegen sanattarynyń eńbekaqylaryn kóterýge 143,4 mlrd teńge somasynda qarajat kózdelgen.
Túzetýlerdiń ekinshi blogy depýtattardyń bastamashylyǵy boiynsha halyqtyń ómir súrý sapasyn arttyrýǵa jáne óńirlerdi damytýǵa baǵyttalǵan.
