Foto: Maqsat Shaǵyrbai / Kazinform
Búgin Parlament Májilisiniń jalpy otyrysynda «Túrkistan qalasynyń erekshe mártebesi týraly» Zańy men ilispe qujat ekinshi oqylymda qaralyp, qabyldandy, dep habarlaidy Ult.kz Kazinform-ǵa silteme jasap.
Atalǵan qujattar 2022 jylǵy 27 qyrkúiekte Memleket basshysynyń Túrkistan oblysyna jumys sapary barysynda berilgen tapsyrmany iske asyrý maqsatynda ázirlendi.
- Ekinshi oqylymǵa daiyndyq barysynda jumys toby barlyq túsken usynystar men tolyqtyrýlardy, birinshi oqylymda qaralǵan máselelerdi jan-jaqty talqylady. Negizgi zań jobasy 3 taraý men 13 baptan turady. Ilespe zań jobasynda sáýlet, qala qurylysy qyzmetin normativtik retteýge jáne tarihi-mádeni mura eskertkishterin qorǵaýǵa baǵyttalǵan ózgerister men tolyqtyrýlar engizý kózdelgen, - dedi Májilis depýtaty Temir Qyryqbaev.
Atalǵan zańdar aiasynda:
- Túrkistan qalasyna erekshe mártebe berýdiń negizgi maqsattary, mindetteri men qaǵidattary aiqyndalady;
- Túrkistan qalasynyń aýmaǵynda tarih jáne mádeniet eskertkishterin qorǵaý qamtamasyz etiledi;
- ortalyq memlekettik organdardyń, sondai-aq Túrkistan qalasynyń jergilikti ókildi jáne atqarýshy organdarynyń ókilettikteri qaitadan qarastyrylyp, jańa quzyret beriledi.
- Nátijesinde, rýhani, tarihi-mádeni muramyzdy saqtaý, qolónershilerdi qoldaý, týrizmdi damytý, qalada kedergisiz ortany qalyptastyrý jáne basqa da igi ister boiynsha jumys qolǵa alynady, - dedi depýtat.
Budan buryn habarlanǵandai, Túrkistan oblysy ákiminiń orynbasary Beisenbai Tájibaev Túrkistan qalasyna zańmen erekshe mártebe berilse, shahar aýmaǵynda jer úi salýdyń talaptary qalai ózgeretinin aitty.
