Parlament Májilisiniń tóraǵasy Nurlan Nyǵmatýlin júrgizýshiler úshin meditsinalyq komissiiadan ótý rásimin ońtailandyrýdy usyndy, dep habarlaidy QazAqparat tilshisi.
Atap aitqanda, Májilistiń jalpy otyrysynda palata depýtattary «Qazaqstan Respýblikasynyń keibir zańnamalyq aktilerine memlekettik qyzmetter kórsetý máseleleri boiynsha ózgerister men tolyqtyrýlar engizý týraly» zań jobasyn birinshi oqylymda maquldady.
Qujatty talqylaý barysynda N. Nyǵmatýlin júrgizýshi kýáligin alý úshin meditsinalyq komissiiadan ótý tártibi jaiynda surady.
Óz kezeginde QR Densaýlyq saqtaý vitse-ministri Oljas Ábishev komissiiadan ótý kezinde 8 dáriger-mamannyń tekserýi jáne 7 analizdi tapsyrý qamtylǵanyn jetkizdi.
«Bul rásimderdi eskersek, sizder júrgizýshini emes, ǵaryshkerdi iriktep jatqandai kórinedi. Búginde múldem basqa jaǵdailar jasalǵan ǵoi. Keibir kórsetkishter boiynsha testileý ótkizý jetkilikti bolar, iaǵni kózdiń kórýi, estý qabileti sekildi negizgi mamandar. Bul jumystardy ońtailandyryp, tiisti usynystar engizińizder», - dedi Májilis tóraǵasy.
Sonymen qatar, N. Nyǵmatýlin meditsinalyq kýálandyrýdy uiymdastyrý sharalaryna da toqtaldy. Osy oraida ol búginde adamdar analiz tapsyrý úshin uzyn-sonar kezekte turatynyn jáne bul jerlerde tiisti jaǵdai jasalmaǵanyn atap ótti.
Májilis spikeriniń paiymynsha, bul máseleni egjei-tegjeili pysyqtaý kerek. Bul rette dárigerlik tekserý erejesin qaita qarastyrý qajet bolyp tur, sebebi osy talaptar mamandandyrylǵan halyqqa qyzmet kórsetý ortalyqtary bolmaǵan kezde bekitilgen. Ol kezde avtomattandyrylǵan qyzmetterdiń, aqparattyq júieler integratsiiasynyń tiisti deńgeii bolmaǵan edi.
«Meditsinalyq tekserý men júrgizýshi kýáligin alý úshin bazany qurǵan kezde osynyń barlyǵyn eskerý kerek. Adamdarǵa qolaily jaǵdai jasaý qajet. Qazirgi kezde bir kezekten ekinshisine barýǵa májbúr. «Azamattarǵa arnalǵan úkimet» memlekettik korporatsiiasymen birlese meditsinalyq tekserýden ótkizýdiń jańa erejesin ázirleńizder. Eń bastysy, usynylatyn qyzmetterdiń sapasyn jaqsartý kerek», - dedi N. Nyǵmatýlin.
