Búgin Parlament palatalarynyń birlesken otyrysynda Májilis tóraǵasy aldaǵy tórtinshi sessiia barysynda júzege asyrylatyn jumystardy jariia etti. Bul jiynda Nurlan Nyǵmatýlin 30 minýt boiy taza qazaq tilinde cóiledi, dep habarlaidy Ult.kz tilshisi QazAqparat agenttigine silteme jasap.
«Búgin biz altynshy sailanǵan QR Parlamentiniń úshinshi sessiiasyn aiaqtap otyrmyz. Bul bizdiń jumysymyzǵa qorytyndy jasap qana qoimai, eń birinshiden aldaǵy maqsattardy josparlaityn óte mańyzdy sát. Árine, depýtattyq korpýstyń búkil jumysy Elbasy Nursultan Nazarbaevtyń úshinshi sessiianyń ashylýynda kórsetken strategiialyq tapsyrmalaryn, sonymen birge Prezidenttiń biylǵy Joldaýynda kórsetilgen barlyq mindetterdi júzege asyrýǵa arnaldy», - dep toqtaldy QR Parlamenti Májilisiniń tóraǵasy Nurlan Nyǵmatýlin.
Birlesken otyrys barysynda ol dástúr boiynsha atqarylǵan jumystarǵa esep berdi. Osy oraida N. Nyǵmatýlin altynshy sailanǵan Parlamenttiń úshinshi sessiiasy óte mańyzdy ári tarihi kezeńde ótkenin atap ótti. Sessiia kezinde depýtattar úkimettik zań jobalarymen qatar, ózderiniń zań shyǵarý bastamasyn da oidaǵydai júzege asyrdy.
«Qabyldanǵan barlyq zańdar, árbir is-sharalar elimizdiń turaqty damýyna, qazaqstandyqtardyń jaǵdaiyn jaqsartýǵa, el birligin arttyrýǵa zor yqpal etetini sózsiz. Bul Senat pen Májilistiń jáne Úkimetpen, barlyq memlekettik organdarmen, qoǵamdyq uiymdarmen birlesip atqarǵan eleýli eńbekteriniń jemisi dep bilemiz. Ótken sessiiada Parlamentte 18 Úkimet saǵaty, alty parlamenttik tyńdaý, 27 «dóńgelek ústel» otyrysy, komitetterdiń 44 kóshpeli otyrysy, sondai-aq úsh halyqaralyq konferentsiia uiymdastyryldy. Olar óte mańyzdy elimizdiń ekonomikalyq jáne áleýmettik máselelerine arnaldy. Eń aldymen, árine, memleketimiz úshin, halqymyz úshin tarihi mańyzy zor jańa álipbi máselesi talqylandy. Osy máselege arnalǵan parlamenttik tyńdaý memleketimizdiń rýhani jańǵyrý jolyndaǵy naqty ári qajetti qadam bolyp tabylady», - dedi Májilis tóraǵasy.
Nurlan Nyǵmatýlin aldaǵy tórtinshi sessiia barysynda júzege asyrylatyn jumystardyń barysyn da jariia etti.
«Aldymyzda áli de talqylanatyn máseleler, qabyldanatyn zańdar, birlesip atqaratyn sharalar óte kóp. Osyǵan orai kelesi tórtinshi sessiiada Parlament Elbasynyń Joldaýy men bes áleýmettik bastamany iske asyrýǵa arnalǵan jumystardy odan ary jalǵastyratyn bolady. Depýtattyq korpýs Úkimetpen tyńyz bailanys jasai otyryp, otandyq ekonomikany kúsheitýge, kásipkerlerdi qoldaýǵa, áleýmettik kepildikterdi saqtaýǵa, elimizdi odan ary qarai nyǵaitýǵa jáne demokratiiany damytýǵa baǵyttalǵan zań qabyldaityn bolady», - dedi N. Nyǵmatýlin.
Qazirgi ýaqytta Parlament qaraýynda 45 zań jobasy bar. Olardyń qatarynda arnaiy ekonomikalyq jáne indýstrialdyq aimaqtar týraly, memlekettik statistika, memlekettik satyp alý máseleleri jónindegi, sondai-aq agroónerkásiptik keshenin retteý, kinematografiia týraly zań jobalary óte mańyzdy bolyp otyr.
«Aldaǵy tórtinshi sessiiada jumyspen qamtý salasynyń problemalary men damý perspektivalary, quqyq qorǵaý qyzmetiniń protsestik negizderin jańǵyrtý barysy siiaqty mańyzdy máseleler boiynsha parlamenttik tyńdaýlar ótkizý josparlanǵan. Jańa sessiia bastalǵannan keiin qazan aiynda Astanada «Investitsiia jastarǵa» degen halyqaralyq konferentsiia uiymdastyrýǵa bastamashy bolamyz», - dedi Májilis tóraǵasy.
Aita keteiik, búgin Parlament palatalarynyń birlesken otyrysy ótip, altynshy sailanǵan Parlament úshinshi sessiiasyn aiaqtady.
