QR Parlamenti Májilisiniń jalpy otyrysynda depýtattar «Qazaqstan Respýblikasy Táýelsizdiginiń 30 jyldyǵyna bailanysty raqymshylyq jasaý týraly» zań jobasyn maquldady, dep habarlaidy QazAqparat.
Májilis depýtattary atalǵan zań jobasyn biraýyzdan maquldap, daýys berdi. Májilis tóraǵasy Nurlan Nyǵmatýlin bul jolǵy raqymshylyq sharasynda áleýmettik osal toptarǵa erekshe kóńil bólingenin atady.
«Biyl egemen elimiz úshin eleýli kezeń. Osyǵan orai Memleket basshysynyń tapsyrmasymen Qazaqstan Respýblikasy Táýelsizdiginiń 30 jyldyǵyna bailanysty raqymshylyq jasaý týraly zań jobasy ázirlenip, búgin maquldanyp otyr. Árine, raqymshylyq memleket tarapynan jasalyp otyrǵan izgi jáne senim sharasy. Sondyqtan bul joly da aldymen memlekettiń jáne azamattardyń qaýipsizdigine qaýip keltirmeitin qylmys jasaǵandar bosatylady. Sonymen birge osy zań jobasynda alǵash ret áleýmettik tómen topqa erekshe nazar aýdarylyp otyr», - dedi Májilis tóraǵasy.
Onyń sózinshe, raqymshylyq aiasynda jazadan bosaǵan adamdardyń qalypty ómirge kirigýine jaǵdai jasalmaq.
«Árine, raqymshylyq jasaý bostandyq berýmen ǵana shektelmeidi. Odan keiin de ol adamdardy jumysqa ornalastyrý, áleýmettik jáne basqa da kómek kórsetý máseleleri osy qujatta jan-jaqty qaraldy», - dedi Nurlan Nyǵmatýlin.
