Parlament Májilisiniń jalpy otyrysynda kórneki aqparat máseleleri boiynsha ózgerister men tolyqtyrýlar engizý týraly zań jobasy ekinshi oqylymda maquldandy, dep habarlaidy QazAqparat.
Zań jobasy 2021 jylǵy 24 aqpanda Qazaqstan Respýblikasy Parlamenti Májilisiniń jalpy otyrysynda birinshi oqylymda maquldandy.
«Zań jobasynyń maqsaty – syrtqy jarnamalar men ártúrli mańdaishalardaǵy, basqa da rekvizistter men kórneki aqparattardyń memlekettik tilde durys jazylýy jáne mátinderdiń túpnusqaly aýdarmasy boiynsha qosymsha talaptardy belgileý. Sailaýshylar jii kóteretin taqyryptardyń biri - osy kórneki aqparattaǵy qazaq tilindegi jazylatyn mátinniń saýatsyzdyǵy, keibir jaǵdaida tipti qazaq tilinde mátinniń bolmaýy. Osyǵan bailanysty naqty talaptar engizildi», - dedi Májilis depýtaty Berik Ábdiǵaliuly.
Zań jobasymen jumys isteý barysynda depýtattar:
- ákimshilik-aýmaqtyq birlikterdiń, eldi mekenderdiń quramdas bólikteriniń, sondai-aq basqa da geografiialyq obektilerdiń dástúrli tarihi qalyptasqan qazaq ataýlaryn memlekettik tilde jazýǵa;
- memlekettik emes uiymdardyń blankileri men mańdaishalaryn memlekettik tilde, qajet bolǵan kezde ǵana orys jáne (nemese) basqa da tilderde jazýǵa;
- jol belgilerindegi jazbany memlekettik tilde jazýǵa;
- habarlandyrýlardy, jarnamany, preiskýranttardy, baǵa kórsetkishterin, as mázirin, nusqaǵyshtar men basqa da kórneki aqparatty memlekettik tilde, qajet bolǵan kezde orys nemese basqa da tilderde ornalastyrýǵa baǵyttalǵan túzetýler engizdi.
«Búl túzetýler qoǵamda, buqaralyq aqparat quraldarynda, áleýmettik jelilerde jii kóterilip júrgen qazaq tiliniń mártebesi máselelerin sheshýge bir qadam jaqyndatady. Osy usynystar árbir azamattyń, ásirese, kásipkerlerdiń jaýapkershiligin kúsheitýge múmkindik beredi dep sanaimyz», - dedi depýtat.
Budan basqa, din salasyndaǵy zańnamany jetildirýdi kózdeitin normalar engizildi.
«Dini qyzmetti reglamentteitin usynystardyń engizilýine bailanysty zań jobasynyń taqyrybyn «Qazaqstan Respýblikasynyń keibir zańnamalyq aktilerine kórneki aqparat jáne dini qyzmet máseleleri boiynsha ózgerister men tolyqtyrýlar engizý týraly» dep ózgertý boiynsha túzetý engizildi. Jumys tobynyń 13 otyrysy jáne Komitettiń keńeitilgen eki otyrysy ótkizildi. Salystyrmaly keste qabyldanǵan 54 pozitsiiadan turady. Depýtattardyń usynystaryn qaraý qorytyndysy boiynsha zań jobasynda Qazaqstan Respýblikasynyń 1 kodeksine jáne 16 zańyna túzetýler engizý kózdelgen», - dedi Berik Ábdiǵaliuly.
