Búgin Parlament Májilisiniń jalpy otyrysynda palata depýtattary «Ardagerler týraly» zań jobasyn jumysqa aldy. Endi Májilis komiteti atalǵan qujat boiynsha talqylaýdy júrgizedi, dep habarlaidy "Ult aqparat".
«Atalǵan zań jobasy Otan aldyndaǵy áskeri ári azamattyq boryshyn atqarǵan Qazaqstan ardagerleri men azamattarynyń quqyqtary men áleýmettik múddelerin qorǵaý salasyndaǵy máselelerdi retteýge baǵyttalǵan. Osy zań jobasy ardagerlerdiń 5 áleýmettik qorǵalatyn sanaty mártebesin belgileýdi kózdeidi», - dedi Májilistiń Áleýmettik-mádeni damý komitetiniń tóraiymy Gúlshara Ábdiqalyqova.
Onyń sózine qaraǵanda, zań jobasynda UOS ardagerleriniń jáne jeńildikter men kepildikter boiynsha soǵys ardagerlerine teńestirilgen tulǵalardyń mártebesin belgileý usynylady.
«Sonymen qatar, basqa memleketterdiń aýmaǵynda jaýyngerlik qimyldar atqarǵan ardagerlerdi, Qazaqstan Respýblikasynyń beibitshilik pen qaýipsizdikti saqtaý jónindegi halyqaralyq mindettemelerin oryndaǵan áskeri qyzmetshilerdi olarǵa jatqyza otyryp, jeke sanatyna bólý usynylady. Zań jobasynda ardagerler úshin áleýmettik qoldaýdyń birqatar sharalaryn belgileý qarastyrylady. Komitet zań jobasyn jumysqa alýǵa ári ol boiynsha qorytyndyny 2020 jyldyń 24 maýsymyna deiin usynýǵa daiyn», - dedi depýtat.
Munymen qosa, jalpy otyrysta «Qazaqstan Respýblikasynyń keibir zańnamalyq aktilerine áleýmettik qamsyzdandyrý máseleleri boiynsha ózgerister men tolyqtyrýlar engizý týraly» ilespe zań jobasy da jumysqa alyndy.
«Atalǵan zań jobasy «Ardagerler týraly» zań jobasyna sáikes keltirý maqsatynda qoldanystaǵy zańnamaǵa ózgerister men tolyqtyrýlar engizýdi kózdeidi. Zań jobasynda ardagerler úshin birqatar áleýmettik quqyqtyq kepildik belgileý qarastyrylǵan.
Osylaisha, qujatta Sotsialistik Eńbek Erlerine jáne úshinshi dárejeli Eńbek Dańqy ordenderiniń iegerlerine 138,6 AEK–ke deiin arnaýly memlekettik járdemaqy mólsherin arttyrý kózdelgen. Sondai-aq basqa memleketterdiń aýmaǵynda soǵys qimyldarynyń ardagerlerine 6,19 AEK mólsherinde arnaýly memlekettik járdemaqy belgileý usynylady», - dedi Gúlshara Ábdiqalyqova.
