Búgin Parlament Májilisiniń jalpy otyrysynda «Ónerkásiptik saiasat týraly» zań jobasy birinshi oqylymda maquldandy, dep habarlaidy QazAqparat.
«Zań jobasy Memleket basshysynyń ótken jylǵy Qazaqstan halqyna Joldaýynda berilgen tapsyrmasyna sáikes ázirlendi jáne óńdeýshi ónerkásipti damytýdyń negizgi qaǵidattaryn, maqsattary men mindetterin aiqyndaidy. Basty mindet - ónerkásiptiń áleýetin tolyq ashý, osy oraida Prezidenttiń tapsyrmasynyń mańyzy óte zor», - dedi QR Indýstriia jáne infraqurylymdyq damý ministri Beibit Atamqulov.
Negizi ónerkásip salasynyń zańnamalyq bazasyn jańartýdyń qajettiligi mynadai basty faktorlarǵa negizdelip otyr:
- ónerkásiptik saiasatty qaita qaraý boiynsha batyl sharalardy talap etetin álemdik ekonomika qysymynyń kúsheiýi.
- ulttyq ekonomikanyń ózindik jetkiliktiligin qamtamasyz etý úshin biznestiń naqty júieli problemalaryn sheshý.
- energetikalyq resýrstar men shikizat metaldaryna álemdik baǵalardyń turaqsyzdyǵy jaǵdaiynda indýstriialandyrý saiasatynyń rólin kúsheitý.
- Qazaqstannyń óndiris salasyna qarajat salýǵa múddeli sheteldik investorlar úshin belgi berý.
«Atalǵan faktorlardy nazarǵa ala otyryp, zań jobasynyń maqsaty aiqyndaldy. Ol – básekege qabiletti, joǵary tehnologiialyq, eksportqa baǵdarlanǵan ónim óndirisin ulǵaitý arqyly sala damýynyń shikizattyq modelinen ketip, óńdeýshi ónerkásiptiń turaqty damýyn qamtamasyz etý», - dedi ministr.
Zań jobasy kelesi negizgi mindetterdi iske asyrýǵa baǵyttalǵan:
1) el halqynyń ál-aýqatyn arttyrý;
2) qazirgi zamanǵy ónerkásiptik infraqurylymdy qurý jáne damytý;
3) jańa joǵary tehnologiialyq óndiristerdi damytý;
4) eńbek ónimdiligin arttyrý arqyly óndiristiń básekege qabilettiligin arttyrý;
5) ulttyq ekonomikanyń ózindik jetkiliktiligin arttyrý.
Zań jobasynda 30-dan astam uǵymdar men terminderdiń anyqtamalary qarastyrylǵan. Olardyń ishinde ónerkásip, óńdeýshi ónerkásip, ónerkásiptik saiasat, Indýstriia 4.0, shikizattyq emes eksport jáne ózge de túiindi uǵymdar qamtylǵan.
Osyǵan bailanysty jańa terminderdi reglamentteý tiimdi ónerkásiptik saiasatty qalyptastyrý úshin quqyqtyq negiz jasaityn bolady.
