Foto: Piroschka Van De Wouw / Reuters
Májilistiń Zańnama jáne sot-quqyqtyq reforma komitetiniń tóraiymy Snejanna Imasheva Qylmystyq kodekstegi QR Tuńǵysh Prezidentiniń ar-namysy men qadir-qasietin jariia túrde qorlaýǵa qylmystyq jaýapkershilik qarastyrylǵan baptardyń kúshi joiylýy múmkin ekenin rastady, - dep habarlaidy Tengrinews.kz saity.
"Iá, mundai túzetýler bar. Aktivterdi qaitarý týraly zańǵa ilespe zań jobasy aiasynda qylmystyq jaýapkershilikti alyp tastaityn normalar bar. Bul Konstitýtsiiaǵa qabyldanǵan túzetý aiasynda. Endi ol jerde Elbasy men onyń ókileti týraly aitylmaidy. Qylmystyq kodekste bul baptar endi qajet emes. Óitkeni "Elbasynyń mártebesi týraly" (zań. – esk.) qazir joq. Sondyqtan qylmystyq jaýapkershilik te qajet emes jáne qoldanylmaidy. Ol buǵan deiin de qoldanylmaǵan", - dedi Imasheva.
Aita keteiik, qazir Májiliste Tuńǵysh Prezident Nursultan Nazarbaevtyń ar-namysy men qadir-qasietin kópshilik aldynda qorlaý jáne onyń abyroiy men qadir-qasietine nuqsan keltirýge qylmystyq jaýapkershilikti qarastyratyn bapty joiatyn zań jobasy qarastyrylyp jatyr.
