Parlament Májilisiniń jalpy otyrysynda «Memlekettik feldegerlik bailanys týraly» zań jobasy birinshi oqylymda maquldandy, dep habarlaidy "Ult aqparat".
«Feldegerlik qyzmetti uiymdastyratyn quzyrly organ – Premer-Ministrdiń keńsesi. Bul qyzmettiń mindeti – Úkimettiń hat almasý jumysyn qamtamasyz etý, memlekettik organdardyń asa mańyzdy ári qupiia hattaryn tasý, arnaiy poshtalardy TMD-ǵa múshe elderge jetkizý», - dedi QR Ishki ister ministri Erlan Turǵymbaev.
Onyń aitýynsha, bul bólimniń qyzmetkerleri ishki ister organdarynyń kadrynda tirkelgen. Sondyqtan olar qarýmen, formamen jáne arnaiy quraldarmen qamtamasyz etiledi. Biraq ishki ister organdarynyń qyzmetkerleri siiaqty qylmys ashyp, tergeý júrgizbeidi.
Zań jobasyn daiarlaý kezinde halyqaralyq tájiribe zertteldi. Birqatar elde feldegerlik bailanys týraly arnaiy zań qabyldanǵan. Biz daiyndaǵan zań jobasynyń maqsaty - feldegerlik qyzmettiń quqyqtyq mártebesin bekitý.
Zań jobasynyń negizgi erejeleri:
1) feldegerlik bailanystyń mindetteri men qaǵidattaryn zańnamalyq bekitýge;
2) Memlekettik feldegerlik qyzmet (MFQ) qyzmetkerleriniń quqyqtary men mindetterin aiqyndaýǵa;
3) MFQ qyzmetkerleriniń quqyqtyq jaǵdaiyn reglamentteýge;
4) MFQ qyzmetkerleriniń áleýmettik kepildikterin belgileýge baǵyttaldy.
Sonymen qatar Májilistiń jalpy otyrysynda «Qazaqstan Respýblikasynyń keibir zańnamalyq aktilerine memlekettik feldegerlik bailanys jáne ishki ister organdary qyzmetiniń máseleleri boiynsha ózgerister men tolyqtyrýlar engizý týraly» ilespe zań jobasy da birinshi oqylymda maquldandy.
