Parlament Májilisi «QR Tuńǵysh Prezidenti – Elbasy týraly» Konstitýtsiialyq zańǵa túzetýler engizip, Senatqa joldady. Bul jaiynda Májilis depýtaty Qanat Nurov málim etti, dep habarlaidy QazAqparat.
«Memleket basshysynyń Parlamenttegi sońǵy sóilegen sózi shyn máninde revoliýtsiialyq boldy. Halyq jeńil tynys aldy. Endi Parlament pen Úkimet onyń barlyq negizdemelerin tolyq, shuǵyl ári naqty júzege asyrýy tiis. Eń aldymen Tuńǵysh Prezidenttiń Qazaqstan halqy Assambleiasy men Qaýipsizdik keńesindegi ómir boiǵy tóraǵalyǵyn joiý qajet boldy. Bul jaiynda ol ózi jariia etti jáne búgin biz iske asyrdyq», - dep jazdy depýtat Facebook-paraqshasynda.
Onyń atap ótýinshe, búgin Májilis tarihi sheshim qabyldap, Konstitýtsiialyq zańdarǵa ózgerister engizgen.
«Senatqa «QR Tuńǵysh Prezidenti – Elbasy týraly», «Qazaqstan halqy Assambleiasy týraly» jáne «QR Qaýipsizdik keńesi týraly» Konstitýtsiialyq zańdarǵa barlyq qajetti túzetýler jóneltildi. Endigi ýaqytta QHA men Qaýipsizdik keńesine tóraǵalyq zań boiynsha, tulǵasy boiynsha emes laýazymyna bailanysty QR Prezidentine tiesili bolady», - dedi Qanat Nurov.
