Parlament Májilisiniń jalpy otyrysynda palata depýtattary «Qazaqstan Respýblikasynyń keibir zańnamalyq aktilerine ana men balany qorǵaý máseleleri boiynsha ózgerister men tolyqtyrýlar engizý týraly» zań jobasyn jumysqa aldy, dep habarlaidy QazAqparat tilshisi.
«Atalǵan zań jobasyna Májilis jáne Senat depýtattary bastamashy boldy. Zań jobasy Memleket basshysynyń Qazaqstan azamattaryn urys-qimyl aimaqtarynan qaitarý, sondai-aq kópbalaly otbasylarǵa áleýmettik qoldaý kórsetý jóninde sharalar qabyldaý týraly tapsyrmalaryn oryndaý aiasynda ázirlendi. Zań jobasynda segiz jáne odan da kóp balalary bar otbasylarǵa ár balaǵa shaqqanda 4 ailyq eseptik kórsetkish mólsherinde járdemaqy taǵaiyndaý usynylyp otyr», - dedi Májilistiń Áleýmettik-mádeni damý komitetiniń tóraiymy Gúlshara Ábdiqalyqova.
Onyń sózine qaraǵanda, qujatta bilim men ǵylym salasyndaǵy ókiletti organǵa terrorizm órship turǵan aimaqtardan kelgen adamdardy, otbasylardy áleýmettik ońaltý men radikaldy kózqarastan aryltý máseleleri jónindegi quzyretti bekitip berý kózdeledi.
«Zań jobasymen 4 zańǵa ózgerister men tolyqtyrýlar engiziledi. Ony iske asyrý teris áleýmettik-ekonomikalyq ári quqyqtyq saldarǵa ákep soqpaidy. Komitet zań jobasyn jumysqa alýǵa jáne ol boiynsha 2020 jylǵy 24 maýsymǵa deiin merzimde qorytyndy ázirleýge daiyn», - dedi G. Ábdiqalyqova.
