Búgin Májilis «Kaspii teńizinde tosyn oqiǵalardy bolǵyzbaý týraly kelisimdi ratifikatsiialaý týraly» QR Zań jobasyn maquldady, dep habarlaidy Baq.kz agenttigi.
«Atalǵan kelisimge 2018 jylǵy tamyzda Aqtaý qalasynda qol qoiyldy. Qujattyń maqsaty – teńizdegi Kaspii mańy memleketteriniń aýmaqtyq sýlarynan tys áskeri kemeleriniń júzýi men onyń ústindegi áýe keńistigindegi áýe kemeleriniń ushý qaýipsizdigin qamtamasyz etý. Kelisimniń erejelerine sáikes, ár taraptyń áskeri kemeleri men áýe kemeleri basqa taraptyń áskeri korablderi men áýe kemelerine jaqyndaǵan kezde qaýipsiz araqashyqtyqta bolýy jáne barynsha saqtyqty tanytýy qajet», - dedi QR Qorǵanys ministriniń orynbasary Talǵat Muhtarov.
Óz sózinde ol áskeri kemeler men áýe kemeleri bir-birine jaqyndaǵan kezde tyiym salynatyn áreketterdi atap ótti.
«Birinshiden, jaýyngerlik manevr jasaý, qarýdy, zymyrandardy, ushý qondyrǵylaryn, qarý-jaraqtyń túrlerin burý jolymen shabýyldardy imitatsiialaýǵa ruqsat etilmeidi. Ekinshiden, teńizde júzý nemese ushý úshin qaýip tóndiretindei jáne kedergi keltiretindei qandai da bir zattardy tastamaýy tiis. Úshinshiden, kemelerdi basqarýda kedergi keltiretindei jaryqtandyrý quraldaryn paidalanýǵa, sondai-aq kemelerdegi jeke quramnyń densaýlyǵyna ziian keltirýge nemese jabdyqtaryna zalal tigizýge tyiym salynady», - dedi Muhtarov.
Onyń aitýynsha, aqparatpen almasý men ózara túsinistikti óristetý úshin áskeri korablder men áýe kemeleri kelisimde aiqyndalǵan jiilikterdegi radiobailanysty paidalanady.
«Kemelerdiń is-qimyldary memleketterdiń egemendigi men airyqsha quqyqtaryna ziian keltirmei júzege asyrylady. Kelisimdi iske asyrý – teńizdegi Kaspii mańy memleketteriniń áskeri kemeleri men ushaqtary arasyndaǵy ózara dostyq qarym-qatynasty arttyrýǵa múmkindik beredi», - dedi Talǵat Muhtarov.
