Májilistiń Ekologiia máseleleri jáne tabiǵat paidalaný komitetiniń otyrysynda depýtattar Qazaqstan Respýblikasynyń Energetika ministri qyzmetine taǵaiyndaý úshin Maǵzým Myrzaǵalievtyń kandidatýrasyn maquldady, dep habarlaidy "Ult aqparat" Májilistiń baspasóz qyzmetine silteme jasap.
Kelisim «Qazaqstan Respýblikasynyń Parlamenti jáne onyń depýtattarynyń mártebesi týraly» Qazaqstan Respýblikasy Konstitýtsiialyq zańynyń 22-1-babyna sáikes Komitet otyrysynda qaraldy.
Kandidatýrany Premer-Ministrdiń tapsyrmasy boiynsha Premer-Ministr Keńsesiniń Basshysy Ǵalymjan Qoishybaev tanystyrdy.
Májiliste engizilgen ministrlerdi kelisý rásimine sáikes, Maǵzým Myrzaǵaliev depýtattardyń suraqtaryna jaýap berip, jumysty uiymdastyrý týraly óziniń kózqarasyn aitty.
Atap aitqanda, Májilis depýtattary el basshylyǵynyń beibit atomǵa kóshý týraly máseleni qaraý jónindegi tapsyrmasyna, gazdandyrý jáne jańartylatyn energetika máseleleriniń mańyzdylyǵyna toqtalyp, osy atalǵan sala boiynsha birqatar suraqtar qoidy.
Nátijesinde, komitet otyrysy boiynsha tiisti qorytyndy ázirlendi. Qujatta Májilistiń Ekologiia máseleleri jáne tabiǵat paidalaný komiteti Maǵzým Myrzaǵalievtyń kandidatýrasyn qarastyryp, ony Energetika ministri laýazymyna taǵaiyndaý úshin usynýǵa bolady dep sanaidy.
