Eńbek jáne halyqty áleýmettik qorǵaý ministrligi qonys aýdarýshylardyń kóship barǵan óńirlerine tezirek beiimdelýine teris áserin tigizip otyrǵan biýrokratiialyq tosqaýyldardy boldyrmaýy qajet.
Bul týraly Májilis depýtaty Káribai Musyrman aitty, dep habarlaidy QazAqparat.
«Eńbek» memlekettik baǵdarlamasy aiasynda jumys kúshi artyq óńirlerdiń turǵyndary jumys kúshi tapshy óńirlerge qonys aýdaryp jatqany málim. «Qazaqstan-2050» strategiiasyna sáikes qolǵa alynǵan bul áleýmettik baǵdarlama óńirlerdi damytýdaǵy teńgerimsizdik máselesin sheshýge oń yqpalyn tigizýde. Jumys kúshi tapshy shekaralas óńirlerdegi demografiialyq ahýal birshama jaqsara tústi. Degenmen, Soltústik Qazaqstan jáne Shyǵys Qazaqstan oblystary turǵyndary sanynyń azaiý úrdisi áli jalǵasýda. Máselen, soltústikqazaqstandyqtardyń sany sońǵy 20 jyl ishinde 160 myń adamǵa kemip, qazir 548 myń ǵana bolyp otyr. Óńirge kóship kelýshilerden kóship ketýshiler kóp. Soltústik Qazaqstan oblysyndaǵy demografiialyq ahýaldyń kúrdeliligi airyqsha kóńil bólýdi qajet etedi. Osyǵan orai óńirdiń áleýmettik-ekonomikalyq jaǵdaiy 2018 jyly Tuńǵysh Prezidentimiz - Elbasy Nursultan Nazarbaevtyń tóraǵalyǵymen ótken Qaýipsizdik keńesiniń otyrysynda arnaiy qaralyp, Úkimetke tiisti tapsyrmalar berilgen bolatyn», - dedi depýtat Májiliste halyqty jumyspen qamtý máseleleri qaralǵan Úkimet saǵatynda.
Onyń aitýynsha, Soltústik Qazaqstan oblysyn áleýmettik-ekonomikalyq damytýdyń 2019-2021 jyldarǵa arnalǵan keshendi jospary jasalyp, iske asyrylyp jatyr. Atalǵan óńirge qonys aýdarýshylardy turǵyn úimen qamtamasyz etý boiynsha ilki joba da qolǵa alynǵan.
»Soltústik Qazaqstan oblysynda qalyptasqan jaǵdaiǵa Memleket basshysy Qasym-Jomart Toqaev ta erekshe nazar aýdaryp, qoldaý kórsetýiniń arqasynda bul óńir arnaýly ekonomikalyq aimaq bolyp aiqyndaldy. Jumys kúshi tapshy óńirlerdegi demografiialyq ahýaldy jaqsartý sharalaryn aldaǵy ýaqytta da jalǵastyrý qajet. Sonymen qatar bizge qonys aýdarýshylardan aldyn ala ýáde etilgen jalaqynyń mólsheri is júzinde álde qaida az bolyp shyqqandyǵy týraly shaǵymdar túsip turady. Buǵan qosa qonys aýdarýshylardy qabyldaý týraly jalǵan qujat jasap, memleket qarjysyn jymqyrý faktileri áshkerelenip jatyr. Osyǵan orai qabyldaýshy óńirdegi jumys berýshilerdiń qonys aýdarýshylardy qabyldaýyna jáne sharttyq mindettemelerin oryndaýyna júieli monitoring júrgizgen jón«, - dedi ol.
Májilis depýtaty munan bólek, qonys aýdarýshylar óz otbasylaryna memlekettik biýdjetten bólinetin materialdyq kómek qarjysyn kóship barǵan óńirlerinde turaqty tirkeýge turmaiynsha ala almaityndyqtaryna shaǵymdanyp jatqanyn aitty.
»Munyń ózi olardyń tirkelýine qajetti turǵyn-jaidy satyp alýyn qiyndatyp jibergen paradoks jaǵdai bolyp shyqty. Eńbek jáne halyqty áleýmettik qorǵaý ministrligi qonys aýdarýshylardyń kóship barǵan óńirlerine tezirek beiimdelýine teris áserin tigizip otyrǵan biýrokratiialyq tosqaýyldardy boldyrmaýy qajet«, - dedi Káribai Musyrman.
