Májilis depýtaty Asylbek Smaǵulov QR Ortalyq sailaý komissiiasynyń múshesi qyzmetine taǵaiyndaldy, dep habarlaidy "Ult aqparat".
Búgin Májilistiń jalpy otyrysynda palata tóraǵasy Nurlan Nyǵmatýlin Asylbek Smaǵulovtyń kandidatýrasyn elimizdiń Ortalyq sailaý komissiiasy múshesi retinde taǵaiyndaý týraly usynys engizgen bolatyn. Depýtattar usynysty biraýyzdan qoldady.
Smaǵulov Asylbek Aijaryquly 1970 jyly Aqtóbe oblysy Yrǵyz aýdanynda dúniege kelgen. Zań ǵylymdarynyń doktory, professor. QR IIM Qaraǵandy joǵary mektebin bitirgen. 2000-2012 jyldary Qazaqstan Respýblikasy Qarjy politsiiasynyń akademiiasynda qylmystyq quqyq jáne kriminologiia kafedrasynyń dotsenti, bastyǵy, akademiia bastyǵynyń ǵylymi-zertteý jumysy jónindegi orynbasary, akademiia bastyǵynyń oqý-ádistemelik jumysyn uiymdastyrý jónindegi orynbasary qyzmetterin atqarǵan. 2012 - 2016 jyldary «Qazaqstan Respýblikasynyń Zańnama institýty» MM direktory qyzmetinde bolǵan.
2016 jylǵy 24 naýryz aiynan bastap «Nur Otan» partiiasynan VI sailanǵan Qazaqstan Respýblikasy Parlamenti Májilisiniń depýtaty bolyp sailandy. Búgingi kúnge deiin Qazaqstan Respýblikasy Parlamenti Májilisiniń Zańnama jáne sot-quqyqtyq reforma komitetiniń múshesi boldy.
Qazaqstan Respýblikasy Prezidentiniń alǵys hatymen, Qazaqstan Respýblikasy Bilim jáne ǵylym ministrliginiń, Qazaqstan Respýblikasy Ekonomikalyq qylmysqa jáne sybailas jemqorlyqqa qarsy kúres agenttiginiń (qarjy politsiiasy) jáne Ádilet ministrliginiń qurmet gramotalarymen, sondai-aq «Eren eńbegi úshin», «Quqyq tártibin qamtamasyz etýge qosqan úlesi úshin», «Ádilet organdary júiesin damytýǵa qosqan úlesi úshin», «MPA SNG. 25 let», «Qazaqstan Respýblikasynyń Táýelsizdigine 25 jyl» medaldarymen marapattalǵan. Ózge de nagradalary bar.
Birqatar basylymdarda jariialanǵan 100-den astam ǵylymi eńbektiń, onyń ishinde 2 oqýlyqtyń (birlesken avtorlyqtaǵy), 10-nan astam oqý quraldary men monografiialardyń avtory.
