Májilis depýtaty, «NUR OTAN» partiiasy fraktsiiasynyń múshesi Qudaibergen Erjan elimizdiń infraqurylym nysandarynyń qurylysyna jáne qaita jandandyrý jumystaryna biýdjetten bólingen memleket qarajattaryn atqarý organdarynyń mardymsyz paidalanýy máselesin kóterip, Májilistiń jalpy otyrysynda depýtattyq saýal joldady, dep habarlaidy QazAqparat.
«Jyl saiyn biýdjetten halyqtyń tynys-tirshiligin qamtamasyz etetin infraqurylymdy damytýǵa qyrýar qarajat bólinedi. Alaida, jyl saiyn aiaqtalǵan, biraq jumys istemeitin nemese jyldan jylǵa aiaqtalmaityn nysandarǵa, jobaly-smetalyq qujattamalardy túzetýlerge, sybailas jemqorlyq quqyq buzýshylyqtaryna, sapasyz istelgen jumystarǵa kezigemiz. Osynyń bári atalǵan salalarda memlekettiń basty maqsattaryna jetýge keri áserin tigizýde. Ózderińizge belgili, Elbasynyń qoldaýymen 2013 jyly «Beineý-Bozoi-Aqbulaq» magistraldy gaz qubyrynyń qurylysy aiaqtalyp, Túrkistan, Jambyl, Almaty oblystaryn tabiǵi gazǵa qosý múmkindigi paida boldy. Degenmen, bitip turǵan gaz qubyrlaryn «QazTransGazAimaq» AQ eksplýatatsiiaǵa almai otyr. Oǵan sebe - tapsyrys berýshi retindegi ákimshilikterdiń jáne eksplýatatsiialaýshy mekeme bolyp sanalatyn «QazTransGazAimaq» AQ arasyndaǵy áreketterdiń kelisilmeýi jáne áreketterdegi tujyrymdamalyq sheshimderdiń bolmaýy. Nátijesinde, tapsyrys berýshi qabyldaǵan nysandar paidalanýǵa berilmeidi, sol arqyly gaz qubyry túrindegi memleket qarajaty ondaǵan jylǵa ainalymsyz qalady», - dedi Q. Erjan Úkimet basshysynyń orynbasary Roman Skliardyń atyna joldaǵan saýalynda.
Onyń aitýynsha, aiqyn mysaldardyń biri ol - Túrkistan oblysynyń Saryǵash jáne Keles aýdandary. Saryaǵash aýdanynyń 13 eldi mekeni jáne Keles aýdanynyń 6 eldi mekeni, jalpy alǵanda 80000-ǵa jýyq halyq gazben qamtylmaǵan. Alaida, atalǵan eldi mekenderde ishki gaz júieleriniń qurylysy aiaqtalǵan. Sonymen qatar, Taskesken aýylyndaǵy AGTS-tyń qurylysy 2013 jyly aiaqtalyp, biraq paidalanýǵa 8 jyl ótken soń 2021 jylǵy 5 tamyzda berildi.
«Óz kezeginde, Saryaǵash aýdanynyń ákimshiligi aǵymdaǵy jylǵy 11 tamyzda Facebook paraqshasyna simvoldy túrde gaz alaýy jaǵylyp, Baǵys jáne Tegisshil aýyldarynyń turǵyn úileri, sonymen birge, Saryaǵash aýdanynyń 38 eldi mekeni, Keles aýdanynyń 39 eldi mekeni gazdandyryldy dep jariialady. Alaida, joǵaryda jazylǵandai «simvoldy túrde gaz alaýy jaǵyldy», iá, bári rasynda da simvoldy túrde ótti, sebebi atalǵan eldi mekender gazǵa qosylmaǵan. Aǵymdaǵy jyldyń 19-27 tamyz aralyǵynda óńirlerge saparymyz aiasynda atalǵan eldi mekenderdiń turǵyndarymen kezdesip, osy jaǵdailarǵa kóz jetkizildi. Mundai jaǵdai elimizdiń basqa óńirlerinde de bar ekenin atap ótý qajet», - dedi depýtat.
Onyń sózine qaraǵanda, búgingi kúni eksplýatatsiialaýshy mekemelerdiń teńgerimine berilmegen nysandardyń jalpy sany 1227 quraidy, onyń ishinde 143 nysan qujattama tolyq jinaqtalmaýy sebebinen, sondai-aq qurylys barysynda jiberilgen tehnikalyq buzýshylyqtardyń saldarynan problemaly bolyp otyr.
Osy oraida joǵaryda atalǵannyń negizinde kelesi máselelerdi qarastyrý usynyldy:
1. Qurylysy aiaqtalyp paidalanýǵa tapsyrylǵan nysandardy eksplýatatsiia jasaýshy mekemeniń teńgerimine ótkizý sharalaryn merzimin qysqartyp ońtailandyrý.
2. Infraqurylymdyq nysandar qurylysynyń joba-smetalyq qujattamasyn daiyndaý jáne tehnikalyq qadaǵalaý jumysyn júrgizý kezinde «QazTransGaz» AQ siiaqty salalyq mekemelerdiń qatysýy.
