QR Parlamenti Májilisiniń jalpy otyrysynda depýtat Baqytbek Smaǵul elordadaǵy kórnekti kóshelerdiń birine Joshy han esimin berýdi usyndy, dep habarlaidy "Ult aqparat".
«Altyn Ordanyń 750 jyldyǵy aiasynda tiisti máselelerge mán berýńizdi suraimyn. Birinshiden, astanamyz Nur-Sultan qalasyndaǵy kórnekti kóshelerdiń birine Joshy han esimin berý jáne ol kóshe boiynda ulys hanynyń eńseli eskertkishin ornatý – ulttyq rýhymyzdy asqaqtatyp, eldigimizdi óz azamattarymyzǵa ǵana emes, elordamyzdyń árbir qonaǵyna pash eter shara bolmaq», - dedi B. Smaǵul Úkimet basshysy Asqar Maminniń atyna joldaǵan depýtattyq saýalynda.
Sonymen qatar ol Joshy hannyń Qaraǵandy oblysyndaǵy, Jezqazǵannyń soltústik-shyǵysynda 50 shaqyrymdai jerdegi Joshy han kesenesi – Shyńǵys han men onyń áýletinen jer betinde qalǵan jalǵyz belgi ekenin atap ótti.
«Sondyqtan onyń janynan bul mazardyń dúniejúzi tarihyn ózgertken dara tulǵaǵa tiesili ekenin alystan áigilep turar aibyndy eskertkish-belgi turǵyzý mańyzdy. Shyńǵys hannyń úlken ulyna arnalǵan tarihi keshen tek Shyǵys elderi úshin ǵana emes, sondai-aq búkil álemdegi saiahatshylar men zertteýshiler úshin zor qyzyǵýshylyq týdyryp, týristik tartymdy orynǵa ainalary sózsiz», - dedi B. Smaǵul.
Onyń sózine qaraǵanda, Altyn ordanyń 750 jyldyǵy aiasynda Joshy han, Alasha han kesenelerine keshendi túrde arheologiialyq, etnografiialyq zertteý jumystary júrgizilgeni jón. Kesenedegi tańbalar men jazýlardy tarihi, tildik turǵyda zerttep, restavratsiia jáne konservatsiia jumystaryn júrgizý qajet.
«Besinshiden, HIII ǵasyrdyń eskertkishi jáne planetamyzdaǵy Shyńǵys han áýletinen qalǵan jalǵyz belgi retinde Joshy han kesenesin keleshekte IýNESKO-nyń «Dúniejúzilik mádeni mura tizimine» engizý joldaryn qarastyrǵan jón. Sebebi, halyqaralyq bedeldi týristik operatorlar, jeke saiahatshylar saparyn josparlaǵanda, kóbine IýNESKO tizimine engen eskertkishterge qarap, baǵyt-baǵdar túzedi», - dedi depýtat.
