Ortalyq sailaý komissiiasynyń múshesi Asylbek Smaǵulovtyń aitýynsha, Májilis depýtaty Bekbolat Tileýhan mindetterin atqarýdan óz erkimen bosatý týraly ótinish bergen.

«Osyǵan orai QR Ortalyq sailaý komissiiasy sizderdiń nazarlaryńyzǵa zańnamaǵa sáikes, Parlament Májilisiniń depýtaty Bekbolat Tileýhannyń ótinish berýine bailanysty onyń ókilettigin merziminen buryn toqtatý týraly máseleni sheshý úshin usynym engizip otyr», - dedi Smaǵulov.

Palata depýtattary bul usynymǵa qoldaý bildirdi.

Májilis tóraǵasy Nurlan Nyǵmatýlin Tileýhannyń jańa qyzmetindegi jumysyna tabys tiledi.

«Bekbolat Qanaiulyn barshańyz jaqsy bilesizder, elimizde tanymal tulǵa. Bekbolat Tileýhandy bilmeitin qazaq joq desek artyq bolmaidy. Ol saiasatta bolsyn, óner salasynda bolsyn, qoǵamdyq jumystarda bolsyn úlken úles qosyp kele jatqan abyroily azamattarymyzdyń biri. Birneshe shaqyrylym Májilis depýtaty boldy, halyqqa qajetti zańdar qabyldaýǵa yqpal etti. Ásirese, elimizdiń áleýmettik-mádeni jolynda Bekbolat Qanaiulynyń róli óte zor. Endi Búkilálemdik etnosport konfederatsiiasynyń birinshi vitse-prezidenti bolyp taǵaiyndaldy, sondyqtan áriptesimizge birlesken jumysy úshin alǵys bildire otyryp, aldaǵy ýaqytta da zor densaýlyq, jańa qyzmette tabys tileimiz», - dedi Nyǵmatýlin.

Jalpy otyrysta Bekbolat Qanaiulyna Májilis atynan «Alǵys hat» tabystaldy.

Bekbolat Tileýhannyń ómirbaiany

Bekbolat Qanaiuly Tileýhan 1966 jyly 7 tamyzda Qaraǵandy oblysynyń Jańaarqa aýdanyndaǵy Atasý kentinde týǵan. Ánshi, jyrshy, pedagog, qoǵam qairatkeri, Qazaqstannyń eńbek sińirgen ártisi (1996), Qazaqstan memlekettik syilyǵynyń laýreaty, Daryn jastar syilyǵynyń iegeri. 

Bilimi – joǵary, 1993 jyly Qurmanǵazy atyndaǵy Almaty memlekettik konservatoriiasyn "kontsert oryndaýshy" mamandyǵy boiynsha, al 1998 jyly Q.Sátbaev atyndaǵy Qazaq memlekettik tehnikalyq ýniversitetin "injener-metallýrg" mamandyǵy boiynsha bitirdi.

1996 jyldan 2001 jylǵa deiin Qazaqstan prezidenti orkestiriniń kórkemdik jetekshisi qyzmetin atqarǵan.

2000 jyldardyń basynda elimizdiń mádeniet salasynda birqatar laýazymdy qyzmet atqardy. 2002-2004 jyldar aralyǵynda mádeniet, aqparat jáne qoǵamdyq kelisim vitse-ministri, mádeniet vitse-ministri qyzmetin atqardy.

2004 jyldan bastap "Nur Otan" partiiasyna múshe.

2016-2021 jyldary VI shaqyrylymdaǵy májilis depýtaty boldy.  2021 jyldyń 15 qańtarynan bastap búgingi kúnge deiin - VII shaqyrylǵan Qazaqstan Respýblikasy parlamenti májilisiniń depýtaty.

Bekbolat Tileýhan buǵan deiin májilistiń III jáne IV shaqyrylymynda depýtat bolǵan. 

1996 jyly memleket basshysy Nursultan Nazarbaevtyń jarlyǵymen "Qazaqstannyń eńbek sińirgen ártisi" qurmetti ataǵy berildi. "Parasat ordenimen", "Qazaqstan konstitýttsiiasyna 10 jyl", "Qazaqstan parlamentine 10 jyl", "Astanaǵa 10 jyl", "Qazaqstan táýelsizdigine 20 jyl" medalderimen marapattalǵan.

Jýyrda Qazaqstan táýelsizdiginiń 30 jyldyǵyna orai Bekbolat Tileýhan III dárejeli "Barys" ordenimen marapattaldy.