Májilis depýtaty Ekaterina Smyshliaeva balalar demalysy infraqurylymyn jańǵyrtý máselesine qatysty pikir bildirdi. Bul jaiynda ol óziniń áleýmettik jelidegi paraqshasynda jazdy, dep habarlaidy "Ult aqparat".
Depýtattyń aitýynsha, 25 jyldyń ishinde qala syrtyndaǵy bazalar sany elimizde eki esege azaiǵan, al qalǵandary kóbine apattyq jaǵdaida.
«Dástúrli balalar demalysynyń ornyn tamaqtandyrýsyz, taza aýasy joq eki saǵattyń mektep janyndaǵy alańdar almastyrdy», - dedi E. Smyshliaeva.
Naqty lagerler sany elimizde 236 boldy. 2019 jyly 210 lager qyzmet etken. Olar jalpy 200 myń balany qamti alady jáne bul kórsetkish barsha kontingenttiń 7 paiyzyn ǵana quraidy.
Onyń paiymynsha, bul jaǵdaiǵa qarjylyq másele áser etip otyr. Osy nysandardyń maýsymdyq jumysyn eskere otyryp, olardy kútip ustaý shyǵyndy bolyp tur.
Bul áleýmettik biznes túrine investorlar qyzyǵýshylyq tanytpai otyr, sebebi osy baǵytta memleket tarapynan yntalandyrý is-sharalary eskerilmegen.
«Shynynda, pandemiia jaǵdaiynda demalysty uiymdastyrý shyǵyndary arta tústi. Lagerlerdiń tolyq júktemede istemeýi, antiseptikter satyp alý, meditsinalyq qyzmetti kúsheitý, demalys ornyna keletin balada PTR-testiń mindetti bolýy joldama qunyn aitarlyqtai qymbattatady. Bul shyǵyndardy ata-analardyń qaltasy kótermeidi», - dedi depýtat.
Osy oraida ol balalardy jazǵy demalys oryndarymen, saýyqtyrýmen naqty qamtýdyń talaptaryn kúsheitetin ýaqyt jetkenin atap ótti. Bul turǵyda tiisti indikatordyń mártebesin buqaralyq talqylaý deńgeiine deiin kóterý kerek bolyp tur.
Ekaterina Smyshliaevanyń sózine qaraǵanda, qalǵan nysandardyń obektivti reviziiasyn júrgizip, balalar demalysy infraqurylymyn kezeń-kezeńmen jańǵyrtýdyń josparyn ázirlep, bul segmentke investorlardyń kelýi múmkindigin aiqyndaý kerek.
Onyń pikirinshe, tiisti qadamdar jasalmasa, ata-analar tarapynan suranys bolmaidy. Sonyń saldarynan balalarǵa qosymsha bilim berý júiesiniń tutas qurylymdyq elementinen aiyrylý qaýpi bar.
