Parlament Májilisiniń jalpy otyrysynda depýtat Ǵaziz Qulahmetov áskeri zeinetkerlerdiń máselesine qatysty Úkimet basshysynyń birinshi orynbasary Álihan Smaiylovtyń atyna saýal joldady, dep habarlaidy QazAqparat.
«Biz áskeri zeinetkerlerdiń baspanamen qamtamasyz etý problemasyna qatysty depýtattyq saýalymyzdy óz atyńyzǵa qaita joldaýǵa májbúrmiz. Sebebi, quzyrly organdardyń jaýabyna qanaǵattanbadyq. Berilgen jaýapta, zapasqa 2013-2018 jyldar aralyǵynda ketken áskeri qyzmetkerlerdiń quqyǵy shektelgen joq, ol azamattarǵa kommýnaldyq baspana qorynan, memlekettik mekeme esebinen turǵyn úi berildi degen ýáj ras bolsa, azamattar óz problemalaryn osy kúnge deiin nege kóteredi? Resmi jaýapta problemasy bar azamattar sany nebári 20 adam degen aqparattyń da adaldyǵy kúmándi. Sebebi, muń-muqtaj, aryz-shaǵymyn aimaqty aralaý kezinde júzbe-júz, jumys adresine, odan qaldy jeke poshtaǵa joldaǵandar sany áldeqaida kóp. Sondyqtan, Tótenshe jaǵdailar ministrligine qarasty zeinetkerlerdiń (qutqarýshy bop qyzmet etken azamattar), keibir quqyq qorǵaý organdary men Aiakóz, Taldyqorǵan, Qapshaǵai, Jarkent, Saryózek, Jetigen, Arys, Shymkent, Gvardeisk, Lýgovskoi áskeri garnizondarynda qyzmet etken áskeri zeinetkerlerdiń amanatyna sońyna deiin adal bolýdy qosh kórip otyrmyz», - dedi Ǵaziz Qulahmetov.
Onyń aitýynsha, áskeriler jumystan ketý merzimine qarai úsh kategoriiaǵa jiktelgen. 2013 jylǵa deiin, 2013-2018 jyl aralyǵy jáne 2018 jyldan bastap ketkenderge ártúrli normalar qoldanylady.
«Bizdiń oiymyzsha, diskriminatsiialyq gradatsiiany, alyp tastap, bárine ortaq norma qoldaný kerek. Osy rette, «Áskeri qyzmet jáne áskeri qyzmetkerlerdiń mártebesi» týraly zańynyń 55 babyndaǵy 6; 6-1; 7 tarmaqtardy alyp tastaǵan jón. Kelesi daýly másele, úi aiyrbastaý normasy. Zańnyń 98 babynda 2013-2018 jyldar aralyǵynda áskeri qyzmetten ketken azamattar sotqa barǵanda 101 baptyń 5 tarmaqshasyna sáikes, menshik iesiniń ruqsatyn alýǵa mindetti bop shyǵady. Menshik iesi bul jaǵdaida - áskeri bólimniń komandiri. Ol da baspana qory joq dep, ruqsatty bermeidi. Sondyqtan, 101-2 babynyń 4 tarmaǵyn, 98 bapty alyp tastap, áskeri qyzmetten ketken, áli de ketetin qyzmetkerlerge 101-2 babynyń 5, 6 tarmaqtaryn qoldanǵan ádil», - dedi depýtat.
Onyń sózine qaraǵanda, kelesi másele, 2018 jyldyń 1 qańtaryna deiin qaza tapqan áskeri qyzmetkerlerdiń bala-shaǵasyna qarailasý máselesine qatysty. Qarjylai kompensatsiia men qyzmettik baspananyń muragerlik jolmen ielený múmkindiginen airylyp otyrǵan jesirler bar. Ol normany iske asyrý úshin Zańnyń 101-9 babynyń 2 tarmaǵyn alyp tastaý usynylady.
«Múgedek áskeri zeinetkerler men densaýlyǵyna bailanysty áskeri qyzmetten ketýge májbúr bolǵan azamattardyń jái-kúii de máz emes. Baspana tólemin sottyń birinshi instantsiia sheshimimen alyp, keiin sottyń joǵarǵy instantsiia sheshimimen qaitadan ol aqshalaryn qaitarýǵa májbúr bop jatqan azamattar da barshylyq. Elimiz áleýmettik memleket dep aitar bolsaq, joǵary da aitylǵan azamattardyń baspana alý múmkindigin shekteý áleýmettik printsipterge qaishy keler Konstitýtsiialyq quqyqtaryn shekteý emes pe?! Salalyq ministrlikter - Qorǵanys ministrligi, Tótenshe jaǵdailar ministrligi qordalanǵan problemalardy sheshý joldaryn izdep, óz zeinetkerleriniń ýájdaryn qanaǵattandyrýǵa nege tyryspaidy? Sonymen qatar, depýtattarǵa ótinish joldaǵan azamattardyń aryzdaryn da qarap, zańda belgilengen tártippen jazbasha jaýap berýlerińizdi suraimyz», - dedi Ǵaziz Qulahmetov.
