Salalyq baǵdarlamalardyń 5 jylǵa ǵana mejelenýi – aiqyn olqylyq. Májilis depýtaty Erlan Qojahmetov munai-gaz-himiia salasyn damytýǵa arnalǵan otyrysta osyndai pikir bildirdi, dep habarlaidy "Ult aqparat".
«Qazaqstannyń munai-gaz-himiia salasyndaǵy damýyn baǵalaǵan sarapshylar, keiingi 20 jylda Resei, Ózbekstan, Túrikmenstan, Ázerbaijan siiaqty kórshi elderdiń qýaty artyp, alǵa ketip qalǵanyn aityp júr. Atalǵan elderde polietilen óndirisiniń kólemi 75 paiyzǵa artqan. Ózbekstan 2030 jylǵa deiin osy salada 123 mlrd dollardyń 31 jobasyn iske asyrmaqshy. Resei Federatsiiasy jańa zaýyttar iske qosqannan keiin jylyna 11 mln tonna polietilen shyǵaryp, Eýropa men Qytai úshin óńirdegi iri eksporttaýshyǵa ainalady. Qazaqstan ózinde polietilen óndirisi bolmasa da, 2014 jyly 225 myń tonna ónim eksporttaǵan. Osynyń bárin eskersek, shuǵyl shara qoldanbasa, Qazaqstan iri investitsiialar men joǵary tehnologiialardan qaǵylýy múmkin», - dedi Májilis ókili.
Onyń aitýynsha, munai-gaz-himiia salasynda álemdik deńgeide de, óńirlik deńgeide de báseke artyp keledi.
«Bir ýaqyt kórshi elderdiń ulttyq jobalaryn jasaǵan sarapshylardyń taldaýyna mán berý kerek. Búginde Eýraziialyq ekonomikalyq odaqtyń árbir múshesi munai-gaz-himiia óniminiń eksportyn arttyrýǵa basymdyq berip otyr. Sóite turyp ár elge naqty bir óndiristi tapsyrý arqyly ortaq naryq qalyptastyrýǵa eshkim ynta tanytyp otyrǵan joq. Ár el bir-birin munai-gaz-himiia salasyndaǵy qoljetimdi naryq retinde kórip otyr. Al úshinshi elderge eksporttaýda bir-birimen básekege túsýge májbúr. Bul aradaǵy qaishylyqty ǵana týyndatady. Osyǵan bailanysty odaqtas elderdiń ónerkásip saiasatyn úilestirý kerek. Ol úshin tereń ónerkásiptik kooperatsiiany iske qosý tiimdi», - dedi Erlan Qojahmetov.
Májilis eldegi salalyq baǵdarlamalardyń 5 jylmen ǵana shektelýi investorlarǵa yńǵaisyz degen oi aitty.
«Qazaqstan úshin mańyzdy salalyq baǵdarlamalardyń kójiegi 5 jyldan aspaidy. Munai-gaz-himiia salasynda ǵana emes, farmatsevtika, jeńil ónerkásip, metallýrgiia salasynda da osylai. Bul – aiqyn olqylyq. Salalyq baǵdarlamalar uzaq merzimge qurylǵanda ǵana investorlarǵa eldiń jalpy damý baǵytyn kórip, josparlar qurýǵa múmkindik beredi. 2025 jylǵa deiin salaǵa 4,2 trln investitsia tartý kózdelip otyr. Ony oryndaý úshin atalǵan syn-qaterlerdi eskerýimiz kerek», - dedi depýtat.
